मुंबई: बॉलिवूड ते हॉलिवूड असा यशस्वी प्रवास करणारी अभिनेत्री प्रियांका चोप्राचे आता जगभरात असंख्य चाहते आहेत. प्रियांका आज एक ग्लोबल स्टार म्हणून ओळखली जाते. पण इथंपर्यंत पोहोचणं तिच्यासाठी अजिबात सोपं नव्हतं. काही दिवसांपूर्वीच प्रियांकाचं तिच्या आतापर्यंतच्या जीवनावर आधारित हे पुस्तक प्रकाशित झालं. ज्यात तिनं तिच्या आयुष्यातील अनेक धक्कादायक खुलासे केले आहेत. या पुस्तकात प्रियांकानं फक्त बॉलिवूडच नाही तर हॉलिवूडमधील प्रवासही कसा खडतर होता याचं वर्णन केलं आहे. प्रियांका जेव्हा शालेय वयात असताना तिच्या आत्याच्या घरी राहून अमेरिकेत शिकत होती. त्यावेळी तिला रंगभेदाचा सामना करावा लागला होता याचा खुलासा तिनं या पुस्तकात केला आहे. पण अनेक वर्षांनंतर जेव्हा मिस वर्ल्ड आणि एक यशस्वी अभिनेत्री म्हणून जेव्हा प्रियांका हॉलिवूडमध्ये पोहोचली त्यावेळीही तिच्यावर मोठ्या प्रमाणावर टीका करण्यात आली होती. प्रियांका आपल्या पुस्तकात सांगते, 'जेव्हा मी अमेरिकेत 'इन माय सिटी' या गाण्यातून सिंगिंग डेब्यू केला होता. त्यावेळी मला तिरस्कारानं भरलेले अनेक इ-मेल्स आणि मेसेज येत असत. लोकांनी त्यात माझा रंग, माझं नागरिकत्व यासारख्या मुद्द्यांवरून माझ्यावर अपमानास्पद कमेंट केल्या होत्या. सिंगिंग डेब्यू केल्यानंतर लोक मला 'ब्राउन टेररिस्ट' म्हणत असत. एका मेसेज मध्ये तर मला तुझ्या देशात परत जा आणि स्वतःचा सामुहिक बलात्कार करून घे अशी असं लिहून पाठवण्यात आलं होत.' फेअरनेस क्रीमची जाहिरात केल्याचा होतो पश्चाताप बॉलिवूडमध्ये यशस्वी करिअरनंतर प्रियांकानं काही म्यूझिक अल्बम रिलीज केले होते. अर्थात नंतर प्रियांकानं सिंगिंग सोडून पुन्हा एकदा अभिनयावर आपलं लक्ष केंद्रित केलं होतं. पण प्रियांकाला पूर्वी ती फेअरनेस क्रीमसाठी जाहिरात करायची या गोष्टीचा आजही पश्चाताप होतो. 'जगात मोठ्या संख्येनं लोक आजही गोऱ्या मुलीला सावळ्या मुलीपेक्षा जास्त सुंदर समजतात.' असं प्रियांकानं आपल्या पुस्तकात लिहिलं आहे. प्रियांका चोप्रानं आपल्या पुस्तकात आपल्या बॉलिवूड आणि हॉलिवूड करिअरमधील अनेक खुलासे केले आहेतच पण त्यासोबतच तिचं शालेय आयुष्य, खासगी आयुष्य, डेटिंग, कुटुंब आणि पती निक जोनस यांच्याशी संबंधितही अनेक किस्से शेअर केले आहेत. प्रियांकाच्या वर्क फ्रंटबद्दल बोलायचं तर काही दिवसांपूर्वीच तिचा 'द व्हाइट टायगर' हा चित्रपट नेटफ्लिक्सवर रिलीज झाला. ज्यात तिचा दमदार अभिनय पुन्हा एकदा पाहायला मिळाला. याशिवाय हिंदीमध्ये 'द स्काय इज पिंक'नंतर प्रियांकाकडे कोणताही चित्रपट नाही मात्र हॉलिवूडमध्ये तिच्याकडे 'मॅट्रिक्स ४' सारखे काही प्रोजेक्ट आहेत.
from Marathi Bollywood News, Marathi Cinema News https://ift.tt/2Nr0LFj