मुंबई- छत्रपती शिवाजी महाराजांच्या जयंतीनिमित्त राज्यभर उत्साहाचं वातावरण आहे. अनेक सेलिब्रिटी सोशल मीडियाच्या माध्यमातून त्यांच्या चाहत्यांना शिवजयंतीच्या शुभेच्छा देत आहेत. यात सैराट फेम रिंकू राजगुरूही मागे नाही. रिंकूनेही इन्स्टाग्रामवरून चाहत्यांना शिवरायांची ख्याती सांगत एक सामाजिक संदेश दिला आहे. रिंकूने इन्स्टाग्रामवर स्वतःचा साडी नेसलेला फोटो शेअर केला. मराठमोळ्या लुकमध्ये रिंकू खूप सुंदर दिसत आहे. हा फोटो शेअर करताना रिंकूने लिहिले की, 'छत्रपती शिवराय हे नावच सर्वसमावेशक आहे. जात महत्वाची नसून अन्यायाविरुद्ध लढणे महत्वाचे आहे.स्वार्थासाठी नव्हे तर स्वराज्यासाठी लढणे महत्वाचे आहे. राजा माझा सुखकर्ता.' अगदी थोड्याच वेळात रिंकूची ही पोस्ट व्हायरल झाली असून सोशल मीडियावर तिच्या लुकची चर्चा होताना दिसत आहे. दरम्यान, काही दिवसांपूर्वी नांदेड येथील सारखनी भागातील लेंगी महोत्सवाला रिंकूला खास पाहुणी म्हणून बोलावण्यात आलं होतं. आता आपल्या गावात येणार म्हटल्यावर तिथे उपस्थितांमध्ये एक वेगळीच उर्जा संचारली. तिला पाहण्यासाठी करोनामुळे लादलेली बंधनंही ग्रामस्थांना नकोशी झाली. तिला पाहण्यासाठी महोत्सवात अक्षरशः झुंबड उडाली होती. आयोजकांनाही रिंकूच्या सुरक्षेसाठी अधिक धावपळ करावी लागली. कार्यक्रमात सोशल डिस्टन्सिंगचा फज्जा उडाला. रिंकू राजगुरूच्या कामाबद्दल बोलायचं झालं तर लवकरच ती 'छूमंतर' या मराठी सिनेमात दिसणार आहे. या सिनेमाचं चित्रीकरण लंडनमध्ये झालं असून सिनेमात प्रार्थना बेहरे, सुव्रत जोशी आणि ऋषी सक्सेना यांच्याही महत्त्वपूर्ण भूमिका आहेत. याशिवाय नागराज मंजुळे दिग्दर्शित अमिताभ बच्चन यांच्या 'झुंड' सिनेमातही रिंकू दिसणार आहे.
from Marathi Bollywood News, Marathi Cinema News https://ift.tt/3qAAfYe
