स्वातीचं () लग्न असतं. तिचे वडील (सुहास पळशीकर) लग्नाचा ‘बस्ता’ आणि रुखवतातली भांडी तसेच इतर वस्तू टेम्पोतून लग्न मंडपात घेऊन येत असतात. अपघाताचं कारण होऊन टेम्पो पोलिसांच्या ताब्यात जातो. टेम्पो पोलिस स्टेशनच्या बाहेर उभा असताना त्याच दरम्यान स्वातीच्या लग्नाचा बस्ता टेम्पोतून चोरीला जातो. स्वातीचे वडील सतत पोलिसांना विनंती करत असतात, की टेम्पो सोडा, माझ्या मुलीचं उद्या लग्न आहे. पोलिस त्यांच्या विनंतीला दाद देत नाहीत. पळून गेलेल्या ड्रायव्हरला हजर करा किंवा विशिष्ट रक्कम भरा मग टेम्पो देतो असं पोलिस त्यांना सांगतात. शेतकरी असलेल्या स्वातीच्या वडिलांनी कर्ज काढून लग्नाचा घाट घातलेला असतो. जेव्हा त्यांना समजतं, की ‘बस्ता’ चोरीला गेला आहे, तेव्हा ते खचतात आणि आत्महत्या करण्यासाठी पोलिस स्टेशनमधून बाहेर पडतात. हुंडा मागणं आणि देणं हा कायदेशीर गुन्हा असल्याचं माहिती असूनही या घटना घडत असतात; हे नाकारता येणार नाही. हीच परिस्थिती दाखवण्याचा प्रयत्न दिग्दर्शक तानाजी घाडगे आणि लेखक अरविंद जगताप यांनी केला आहे. ही गोष्ट समाजाच्या डोळ्यात अंजन घालणारी आहे; परंतु मांडणी करताना, पटकथा फुलवताना ती रटाळ होते. नायक-नायिकेचा प्रेमगाण्यांचा पटकथेतला शिरकाव खटकण्यासारखा आहे. कथेत घडणाऱ्या काही विशिष्ट घटना विविधांगी मुद्द्यांवर अर्थात रुढी-परंपरा, चालीरीती यांच्यावर प्रकाश टाकतात; पण त्या सिनेमात मांडताना मुद्दाम पेरलेल्या वाटतात. गोष्ट म्हणून सिनेमा उजवा असला; तरी तो पडद्यावर पाहताना प्रेक्षकांना गुंतवून ठेवण्याची किमया साधत नाही. संवाद मात्र खुशखुशीत आहेत. सिनेमाची गोष्ट मुख्यतः लग्नाच्या ‘बस्त्या’भोवती फिरते. स्वातीला शेतकरी मुलाशी लग्न करायचं नसतं. तिला सरकारी नोकरी असणारा नवरा हवा असतो. दुसरीकडे स्वातीच्या मामाचा मुलगा मन्या (अक्षय टंकसाळे) तिच्या प्रेमात असतो. तो शेतकरी असल्यानं स्वाती त्याला लग्नासाठी नजरेआड करत असते. स्वातीचे वडील आणि आई (शुभांगी गोखले) घरातले दागिने, शेतजमीन गहाण ठेवून हुंड्यासाठी आणि दोन्हीकडच्या लग्न खर्चासाठी पैसे उभे करतात. हे स्वातीच्या नजरेसमोर होत असतं; पण मग अशा काही घटना घडतात, की लग्नाच्या बस्त्यावरून ‘महाभारत’ रंगतं. या सगळ्यांत स्वातीचं लग्न होतं का, कुणाबरोबर होतं, उपरोक्त प्रसंगात दाखवल्याप्रमाणे; चोरीला गेलेल्या ‘बस्ता’चं काय होतं? हे जाणून घेण्यासाठी सिनेमा पाहायला हरकत नाही. वडिलांच्या भूमिकेत सुहास पळशीकर यांनी आपली दमलेल्या शेतकरी बापाची भूमिका उमदा साकारली आहे. यांनी साकारलेली आई ही ‘श्रीयुत गंगाधर टिपरे’ मालिकेतल्या आईची आठवण करुन देणारी आहे. स्वातीच्या भूमिकेत सायली संजीवनं उत्तम कामगिरी केली आहे. मन्याच्या भूमिकेत असलेल्या अक्षय टंकसाळेनंही त्याची भूमिका समर्पक साकारली आहे. नवऱ्या मुलाच्या आत्याची भूमिका साकारणारी अभिनेत्री लक्ष वेधून घेते. निर्मिती ः सुनील फडतरे दिग्दर्शक ः तानाजी घाडगे कथा, पटकथा, संवाद ः अरविंद जगताप कलाकार ः सायली संजीव, सुहास पळशीकर, शुभांगी गोखले, अक्षय टंकसाळे, प्राजक्ता हणमघर, पार्थ भालेराव, संगीत ः संतोष मुळेकर छायांकन ः सूर्या मिश्रा संकलनः आशिष म्हात्रे, अपूर्वा मोतीवाले ओटीटी ः झी प्लेक्स दर्जा ः २.५ स्टार
from Marathi Bollywood News, Marathi Cinema News https://ift.tt/3curD16
