मुंबई: अभिनेत्री सुश्मिता सेनचा बॉयफ्रेंड रोहमन शॉलनं आता मॉडेलिंगच्या जगात स्वतःचं वेगळं स्थान निर्माण केलं आहे. पण अनेकजण त्याला सुश्मिताचा बॉयफ्रेंड म्हणूनच ओळखतात. पण रोहमनच्या मते प्रसिद्ध होणं हे त्याच्या विशलिस्टचा भाग कधीच नव्हतं. काही दिवसांपूर्वीच त्याचं 'मौला' हे अल्बम सॉन्ग रिलीज झालं. पण रोहमन सांगतो की, त्याला अभिनयात अजिबात इंटरेस्ट नाही. बॉम्बे टाइम्सला दिलेल्या मुलाखतीत रोहमननं अनेक गोष्टींचा खुलासा केला. रोहमन म्हणाला, 'मला अभिनेता कधीच व्हायचं नव्हतं. मी हा म्यूझिक व्हिडीओ फक्त एक मॉडेल म्हणून केला. पण मला अभिनय कधीच करायचा नव्हता. सामान्यपणे असं मानलं जातं की मॉडेल्स शेवटी अभिनय क्षेत्रात उतरतात. मी अभिनय शिकण्यासाठी काही क्लास सुद्धा जॉइन केले होते. पण काही दिवसांतच मला समजून चुकलं की, ही गोष्ट मला स्वतःकडे कधीच आकर्षित करत नाही.' रोहमननं सांगितलं, 'सुपरमॉडेल होण्याचं स्वप्न मी नेहमीच पाहिलं होतं. पण जेव्हा सुश्मिता माझ्या लाइफमध्ये आली त्यावेळी माझ्या लाइफमध्ये खूप बदल झाले. माझा जन्म काश्मीरमधला आहे पण मी नैनीतालमध्ये लहानाचा मोठा झालो. त्यांनंतर इंजिनिअरिंगसाठी मी डेहराडूनला गेलो. कॉलेजमध्ये असताना एका मित्रानं मला मॉडेलिंग करण्याविषयी सुचवलं. त्यानंतर ५-६ वर्षांनी मी मुंबईला आलो. त्यानंतर २ वर्षांनी मी सुश्मिताला भेटलो.' रोहमनला जेव्हा सुश्मिताशी लग्न करण्याबाबतचा प्लान विचारण्यात आला तेव्हा तो म्हणाला, 'सुश्मिता, तिच्या मुली आणि मी आम्ही सर्व एक कुटुंब आहोत. मी दोन्ही मुलींसोबत नेहमीच वडीलांसारखा राहतो. कधी मी त्यांचा मित्र होतो. तर कधी मी त्यांच्याशी वाद सुद्धा घालतो. आम्ही सर्व एखाद्या सामान्य कुटुंबासारखं राहतो आणि ही गोष्ट आम्ही सर्वच एन्जॉय करतो. त्यामुळे लग्न आणि याच्या संबंधीत गोष्टींचा विचार आम्ही अद्याप केलेलाच नाही. जेव्हा आम्ही लग्न करू तेव्हा आम्ही कोणापासून लपवणार नाही.' या मुलाखतीत रोहमननं त्याच्या आणि सुश्मिताच्या वयात असणाऱ्या अंतरावरही भाष्य केलं. तो म्हणाला, 'आमच्या दोघांच्या वयात १५ वर्षांचं अंतर आहे. सुरुवातीला मी माझ्या कुटुंबापासून सुश्मितासोबतचं माझं नातं लपवलं होतं. त्यांना सोशल मीडियामुळे आमच्या नात्याबद्दल समजलं. पण माझ्या फॅमिलीमध्ये सर्वच समजदार आहेत. त्यामुळे माझ्या या निर्णयात ते माझ्या पाठिंशी खंबीरपणे उभे राहिले. पुरुषांना नेहमीच मॅच्युरिटी हवी असते. कारण ते कोणत्याच वयात पूर्णपणे मॅच्युअर नसतात. जेव्हा एक खंबीर स्त्री तुमच्या आयुष्यात येते तेव्हा तुम्ही काहीही करण्यासाठी सक्षम होता.'
from Marathi Bollywood News, Marathi Cinema News https://ift.tt/3cM4dEx
