बॉलिवूडमध्ये हॉलिवूड सिनेमांचं रिमेक करणं हे काही नवीन नाही. या यादीत 'द गर्ल ऑन द ट्रेन'चा समावेश झाला आहे. हा रिमेक लेखिका-दिग्दर्शिका रिभू दासगुप्ता यांनी केला आहे. या हिंदी चित्रपटाचा ढाचा हा मूळ हॉलिवूडपटासारखाच आहे. गोष्टही तीच, त्यातली व्यक्तिरेखादेखील त्याच आहेत. केवळ सिनेमा हिंदी असल्यानं त्यातील व्यक्तिरेखांचे संदर्भ हे भारतीय आहेत. लंडनमधील लोकल ट्रेनमध्ये प्रवास करणाऱ्या एका भारतीय मुलीची भावनिक आणि तितकीच रोमहर्षक गोष्ट दिग्दर्शिकेनं पडद्यावर मांडली आहे. ही गोष्ट जर भारतात घडली असती, तर दासगुप्ता यांनी काहीतरी नवी निर्मिती केलीय; असं म्हणता आलं असतं. पण, ही गोष्ट मूळ सिनेमाप्रमाणे लंडनमध्येच घडते. परिणामी, हा सिनेमा काहीसा मूळ इंग्रजी सिनेमाची कॉपी असल्याचा भासतो. सिनेमातील थरार शेवटपर्यंत ताणण्याचं श्रेय हे पटकथा लेखकाला जातं. सर्वसामान्य बॉलिवूडपटाप्रमाणे नायक-नायिका त्यांच्या मित्र-मैत्रिणीच्या लग्नात एकमेकांना भेटतात. ते एकमेकांच्या प्रेमात पडतात, त्यांचं लग्न होतं. ही अशीच सुरुवात 'द गर्ल ऑन द ट्रेन'ची आहे. सिनेमाची नायिका मीरा कपूर () आहे, ती ब्रिटनमधील प्रसिद्ध वकील असते. मीरा आणि शेखरचं () लग्न होतं. त्यांना बाळ होणार असतं. पण दुर्दैवानं त्यांच्या गाडीचा अपघात होतो. या अपघाताचा संदर्भ असा की, मीरा एक खटला लढत असते, त्यात ती एका गँगस्टरला दोषी ठरवते. त्याचा निकटवर्ती बदला म्हणून मीराचा अपघात घडवून आणतो. अपघातात मीरा आपलं बाळ गमावते. तो धक्का सहन होत नाही. तिला मद्याचं व्यसन जडतं. तसंच तिला अपघातामुळे जबरी मानसिक धक्का बसलेला असतो. परिणामी, तिला गोष्टी किंवा प्रसंग विसरण्याचा मनोविकार बळावतो. तिच्या मद्यपानाच्या सवयीला कंटाळून शेखर तिला घटस्फोट देतो. हे सर्व प्रसंग एकामागोमाग एक घडत जातात. पण, मूळ कथानकाला सुरुवात होत ते मीराच्या ट्रेन प्रवासानं. मीरा एका स्टेशनवरून ट्रेन पकडते आणि दुसऱ्या स्टेशनला उतरते. या प्रवासादरम्यान तिला ट्रेन बाहेर दोन घरं दिसतात. एक घर जे तिचं स्वत:चं असतं, तिथे ती पूर्वी शेखरसह राहत असते. पण, आता त्या घरात शेखर त्याच्या दुसऱ्या पत्नीसह राहत असतो. दुसरं घर म्हणजे नुसरत () नामक एका हसमुख आनंदी मुलीचं घर मीराचं लक्ष वेधून घेतं. मीरा स्वतःचं आनंदी रुप नुसरतमध्ये बघत असते. दरम्यान एके दिवशी मीरा नुसरतला अनोळखी व्यक्तीशी जवळीक साधताना पाहते. आता द्वेषानं आणि बदल्याच्या भावनेनं पेटलेली मीरा नुसरतला प्रत्यक्ष भेटायला तिच्या घरी जाते. तेव्हा काही घटना अशा घडतात की मीरा देखील जखमी होते आणि दुसरीकडे नुसरतची हत्या होते. एक पोलिस वरिष्ठ अधिकारी () या हत्येचा तपास घेत असते. मीराच संभाव्य गुन्हेगार आहे, असा प्रथमदर्शी अंदाज पोलिस बांधतात. त्यानंतर कथानक रंजक वळण घेतं. ते जाणून घेण्यासाठी तुम्हाला सिनेमा नक्कीच पाहायला हवा. चित्रपटाच्या सुरुवातीपासून परिणीती चोप्रानं मीरा ही व्यक्तिरेखा उत्तमरित्या साकारली आहे. दिग्दर्शक रिभू दासगुप्ताने सुरुवातीपासूनच चित्रपटावर आपली पकड ठेवली आहे. पण सिनेमांच्या रिमेकबाबत ‘सेफ गेम’ खेळला आहे. नुसरतची भूमिका साकारणाऱ्या अदितीनं उत्तम काम केलं आहे. चित्रपटाचा पूर्वार्ध फारसा आकर्षित करत नाही, पण उत्तरार्ध रंजक झाला आहे. पोलिस अधिकारी म्हणून कीर्ती कुल्हारीची व्यक्तिरेखादेखील सरस आहे. सिनेमांच्या तांत्रिक बाजूही अव्वल आहेत. एकंदरीत, एखाद्या हॉलिवूडपटाचा हिंदी रिमेक बनवणं ही मोठी जबाबदारी आहे आणि ती चित्रपटाच्या टीमनं यशस्वीपणे पार पाडली आहे. सिनेमा: द गर्ल ऑन द ट्रेन निर्मिती: रिलायन्स एंटरटेनमेंट दिग्दर्शक: रिभू दासगुप्ता संवाद: गौरव शुक्ला, अभिजीत खुमान कलाकार: परिणीती चोप्रा, अदिती राव हैदरी, कीर्ती कुल्हारी, अविनाश तिवारी छायांकन: त्रिभुवन बाबू सदिनेनी संकलन: संगीत वर्गीस ओटीटी: नेटफ्लिक्स दर्जा: तीन स्टार
from Marathi Bollywood News, Marathi Cinema News https://ift.tt/2ZZQDWx
