मुंबई- मुलांच्या पालन पोषणासाठी आई आणि वडील दोघांच्याही प्रेमाची आवश्यकता असते. मुलं आपल्या आईच्या जास्त जवळ असतात. परंतु, सिंगल मदर बनून आपल्या मुलांना आई- वडिलांचं प्रेम देणं वाटतं तितकं सोपं नसतं. बॉलिवूडमध्ये अशा काही अभिनेत्री आहेत ज्यांनी जगाच्या नियमांना झुगारून एकटं राहून मुलांचा सांभाळ केला. जाणून घेऊया अशाच काही अभिनेत्रींबद्दल. पूनम धिल्लोन यांनी चित्रपट निर्माते अशोक ठकेरिया यांच्यासोबत विवाह केला होता. लग्नानंतर त्यांना दोन मुलं झाली. अशोक यांच्यापासून वेगळं झाल्यानंतर पूनम त्यांच्या दोन्ही मुलांचा सांभाळ करत आहेत. नीना गुप्ता नीना गुप्ता आणि वेस्ट इंडीजचे माजी क्रिकेटपटू विवियन रिचर्ड्स यांची प्रेमकहाणी सर्वश्रुत आहे. नीना आणि विवियन यांची मुलगी मसाबा आज खूप मोठी फॅशन डिझायनर आहे. नीना यांनी विवियनसोबत लग्न केलं नाही. त्यांनी एकटीने मसाबाचा सांभाळ केला. अभिनेत्री सुष्मिता सेन तर सगळ्यांसाठीच एक प्रेरणा आहे. सुष्मिताने अजूनही लग्न केलेलं नाही. वयाच्या २५ व्या वर्षी सुष्मिताने रिनीला दत्तक घेतलं आणि २०१० साली तिने दुसरी मुलगी अलीशाला दत्तक घेतलं. सुष्मिता एकटी आपल्या दोन्ही मुलींची जबाबदारी सांभाळते. करिश्मा कपूर बॉलिवूड अभिनेत्री करिश्मा कपूर हिने २००३ साली दिल्लीतील बिजनेसमन संजय कपूरसोबत लग्नगाठ बांधली होती. परंतु, लग्नाच्या ११ वर्षांनंतर त्यांचा घटस्फोट झाला आणि करिश्मा तिच्या दोन्ही मुलांचा एकटी सांभाळ करत आहे. सारिका हसन अभिनेते कमल हसन यांची दुसरी पत्नी आणि अभिनेत्री सारिका यांनी लग्नापूर्वीच श्रुती हसनला जन्म दिला होता. कमल यांच्यासोबत लग्नानंतर त्यांनी अक्षराला जन्म दिला. २००४ साली कमल आणि सारिका यांचा घटस्फोट झाल्यानंतर सारिका यांनी दोन्ही मुलींचा सांभाळ केला. अमृता सिंग अभिनेता सैफ अली खान याची पहिली पत्नी अमृता सिंगने सैफसोबत घटस्फोट झाल्यानंतर आपल्या दोन्ही मुलांचा सांभाळ एकटीने केला. अमृता मुलगी सारा अली खान आणि मुलगा इब्राहिम अली खान यांच्यासोबत राहते. कोंकणा सेन- शर्मा कोंकणा सेन- शर्माने अभिनेता रणवीर शौरीसोबत विवाह केला होता. परंतु. त्यांचं लग्न फारकाळ टिकू शकलं नाही. कोंकणा लग्नाआधीच गरोदर होती. रणवीरपासून वेगळं झाल्यावर कोंकणा आपल्या मुलाचा सांभाळ करत आहे. मुलाच्या पालन पोषणासाठी कोंकणाने चित्रपटांमधून ब्रेक घेतला.
from Marathi Bollywood News, Marathi Cinema News https://ift.tt/3bmqAz1
