मुंबई : 'तारक मेहता का उल्टा चश्मा' या लोकप्रिय मालिकेत टप्पूची भूमिका साकारणाऱ्या भव्य गांधीच्या वडिलांचे नुकतेच करोनामुळे निधन झाले. वडिलांच्या निधनानंतर भव्यने एक भावुक पोस्ट शेअर केली आहे. ही पोस्ट शेअर करताना करोना आजाराला गंभीरपणे घ्या आणि प्रत्येकाने वॅक्सिनही घ्या असे आवाहन केले आहे. काय लिहिले भव्यने भव्य गांधी याच्या वडिलांचे विनोद गांधी यांचे करोनामुळे निधन झाले. त्यांच्या आठवणींना उजाळा देत भव्यने एक पोस्ट शेअर करून दिला आहे. भव्यने लिहिले आहे, 'माझ्या बाबांना ९ एप्रिल रोजी करोना असल्याचे निदान झाले. त्यानंतर त्यांना योग्य ते औषधोपचार सुरू केले. त्यांची तब्येत बिघडल्याने त्यांना इस्पितळात दाखल केले. तिथे त्यांच्यावर डॉक्टर उपचार करत होते. माझे बाबा देखील करोनाशी शेवटच्या श्वासापर्यंत निकराने लढले. करोनाबरोबरचे हे युद्ध एखाद्या राजाप्रमाणे ते लढले..पण अखेर ते लढाई हरले.' भव्यने पुढे लिहिले की, 'आज माझ्या आयुष्यात जे काही चांगले आहे, उत्तम आहे ते माझ्या बाबांमुळेच झाले आहे. बाबा नेहमीच त्यांच्या तब्येतीची काळजी घ्यायचे. कोविडच्या आधीच्या काळातही आणि कोविड झाल्यानंतर तर जास्त काळजी घ्यायचे. त्यांनी इतकी काळजी घेऊनही या कोविडने त्यांना गाठलेच.' ही पोस्ट शेअर करत असताना भव्यने एक आवाहन केले आहे, तो म्हणाला, 'मी सर्वांना एक विनंती करतो की सगळ्यांनी करोनाचे वॅक्सिन घ्या. करोना आहे की नाही. अशा गोष्टींकडे लक्ष देऊ नका. कारण तो आहे. त्याच्याविरोधात लढायचे असेल तर करोनाचे वॅक्सिन प्रत्येकाने घ्यायलाच हवे.' या पोस्टच्या शेवटी भव्यने त्याच्या वडिलांवर उपचार करणाऱ्या सर्व डॉक्टरांचे, नर्स आणि हॉस्पिटलच्या कर्मचाऱ्यांचे आभार मानले आहेत. तसेच सोनू सुद, राकेश कोठारी, नरेंद्र हिरानी,पिनाकीन शहा आदी मित्रांचेही त्याने आवर्जून आभार मानले आहेत. पोस्टच्या शेवटी त्याने लिहिले आहे की, 'बाबा तुम्ही जिथे कुठे असाल तिथे आनंदी रहा. तुम्ही मला जे जे काही शिकवले त्याबद्दल मी आभारी आहे. खूप खूप प्रेम...' भव्यने शेअर केलेल्या या पोस्टवर अनेक कलाकारांनी कमेन्ट करत त्याचे सांत्वन केले आहे.
from Marathi Bollywood News, Marathi Cinema News https://ift.tt/3bt0QRp
