मुंबई: करोना व्हायरसचं वाढतं संक्रमण रोखण्यासाठी राज्य सरकारनं संपूर्ण राज्यात लॉकडाऊनचे निर्बंध कडक केले आहे. ज्यामुळे अति आवश्यक कामाव्यतिरिक्त कोणालाही घराबाहेर पडण्यास परवानगी नाही. पण तरीही काही बॉलिवूड सेलिब्रेटी सकाळी किंवा संध्याकाळी वॉकला बाहेर पडताना दिसतात. अभिनेता नसीरुद्दीन शाहसुद्धा असेच बुधवारी संध्याकाळी वॉकसाठी निघाले होते. पण त्यांना लगेचच घरी परतावं लागलं. मुंबई पोलिसांनी त्यांना घरातून बाहेर पडण्यासाठी मानई केली आहे. त्यांचा हा व्हिडीओ सध्या सोशल मीडियावर खूप व्हायरल होताना दिसत आहे. सोशल मीडियावर यांचा व्हिडीओ चर्चेत आहे. ज्यात ते संध्याकाळच्या वॉकसाठी बाहेर निघालेले दिसत आहेत. तेवढ्यातच एक पोलीस त्यांना वॉकला न जाण्याविषयी सांगतात. तसेच लॉकडाउनच्या नियमांचं पालन करण्याचं सुचवतात. ज्यामुळे नसीरुद्दीन शाह यांना आल्या पावलीच पुन्हा घरी परतावं लागलं. सूत्रांनी दिलेल्या माहितीनुसार पोलिसांनी हटकल्यानंतर कोणताही वाद न घालता नसीरुद्दीन शाह यांनी यू-टर्न घेतला आणि त्यांच्या घरी परतले. मागच्या बऱ्याच काळापासून सर्वांनाच करोनाच्या नियमांचं पालन करून वॉकला न जाण्याविषयी सांगत आहेत. मात्र काही सेलिब्रेटी मात्र त्याकडे दुर्लक्ष करत सकाळी किंवा संध्याकाळी वॉकला जाताना दिसतात. नसीरुद्दीन शाह आठवड्यातून २-३ वेळा वॉकसाठी बाहेर जातात. मागच्या वर्षीही पत्नी रत्ना पाठकसोबत ते लॉकडाउनच्या काळात वॉकला गेलेले पाहायला मिळाले होते. नसीरुद्दीन शाह मुंबईच्या वांद्रे भागात राहतात आणि ते नेहमीच कार्टर रोड परिसरात वॉकसाठी गेलेले असताना कॅमेऱ्यात कैद होतात.
from Marathi Bollywood News, Marathi Cinema News https://ift.tt/3uSlZeU
