गेल्यावर्षी अनलॉक झाल्यावर अक्षयकुमारनं ‘’ या चित्रपटाचं चित्रीकरण पूर्ण केलं. आता अनलॉक होत असताना हा चित्रपट त्यानं प्रदर्शित केला आहे. यापूर्वी अक्षयनं भारतीय गुप्तचर यंत्रणेवर आधारित चित्रपट केले आहेत; पण त्यानं आजवर काम केलेल्या चित्रपटांच्या तुलनेत हा चित्रपट वेगळा आहे. हा चित्रपट मनोरंजनासह प्रेक्षकांना शेवटपर्यंत खिळवून ठेवण्यात यशस्वी होतो. चित्रपटातल्या एका प्रसंगात भारतीय गुप्तचर यंत्रणेला दुबई विमानतळावर दहशतवाद्यांच्या कारवाया रोखण्यासाठी एक ‘कव्हर्ड ऑपरेशन’ करायचं असतं. रक्तपात होईल म्हणून दुबई सरकार परवानगी देत नाही. दहशतवाद्यांशी चर्चा करून हा तिढा सोडवण्याचा सल्ला ते भारतीय अधिकाऱ्यांना देतात. आपल्या सल्ल्याला पुष्टी देण्यासाठी दुबई सरकार भारतीय अधिकाऱ्यांना सांगतं, ‘तुम्ही महात्मा गांधीजींच्या भूमीतले आहात. शांततेच्या मार्गानं कारवाई करायला हवी.’ त्यानंतर थेट चित्रपटाच्या उत्तरार्धात ‘बेल बॉटम’ अर्थात अक्षयकुमार या विधानाला प्रत्युत्तर देताना म्हणतो, ‘आम्ही ज्याप्रमाणे महात्मा गांधी यांच्या भूमीतले आहोत, तसेच आम्ही सुभाषचंद्र बोस यांच्या भूमीतलेही आहोत.’ या वाक्यात चित्रपटाचा सारांश येतो. दिग्दर्शक रणजीत तिवारीनं चित्रपटाची कथा मांडताना काहीही अतिरंजित दाखवलेलं नाही. लेखक-दिग्दर्शकानं नाट्यमय घडामोडी दाखवण्याचा अट्टाहास केला नसल्यानं हा चित्रपट वेगळा ठरतो. सत्य घटनांवरून प्रेरित होत या चित्रपटाची कथा रचण्यात आली आहे. ती एका भारतीय ‘रॉ एजंट’भोवती फिरते. १९८४ मध्ये भारत आणि पाकिस्तान यांच्यात दिखाव्यासाठी मैत्रीपूर्ण संबंध असतात. पडद्याआड पाकिस्तान ‘आयएसआय’च्या मदतीनं भारताविरुद्ध दहशदवादी कारवाया करत असतं. यातच ते एका भारतीय प्रवासी विमानाचं अपहरण करतात. यात दोनशेहून अधिक भारतीय नागरिक असतात. दहशतवादी हे विमान दुबईला नेतात. नागरिकांच्या सुटकेच्या मोबदल्यात तुरुंगांमध्ये असलेल्या साथीदारांना सोडण्याची मागणी ते करतात. भारत सरकार आणि पंतप्रधान इंदिरा गांधी () यांच्याकडून एका रॉ एजंटला पाचारण करण्यात येतं. या रॉ एजंटचं नाव ‘बेल बॉटम’ (अक्षयकुमार) असतं. तो दहशवाद्यांच्या तावडीतून नागरिकांची सुटका कशी करतो, हे जाणून घेण्यासाठी चित्रपट पाहायला हवा. रॉ एजंट होण्यामागची गोष्टही रंजक आहे. ‘लखनऊ सेंट्रल’फेम दिग्दर्शक रणजीत तिवारीनं अक्षयकुमारला चित्रपटात योग्य पद्धतीनं सादर केलं आहे. अक्षयचं पात्र कुठंही अतिभडक किंवा नाटकी नाही. वास्तवाशी सांगड घालत त्यानं संपूर्ण गोष्ट मांडली आहे. पात्रांच्या अचूक निवडीनं चित्रपट सिनेमा सुरेख विणला गेला आहे. पूर्वार्धात चित्रपट भरकटतोय असं वाटतं; पण उत्तरार्ध पाहिल्यावर या दृश्यांचा संदर्भ लागतो. एक ‘बॅक स्टोरी’ चित्रपटात दडली आहे. ती मूळ कथेला भक्कम करते. संकलन आणि छायांकनही उत्तम. पार्श्वसंगीत ही या चित्रपटाची आणखी एक जमेची बाजू. अक्षयकुमारने भूमिकेला पूर्ण न्याय दिला आहे. इंदिरा गांधी यांची भूमिका लारानं सहजसुंदर साकारली आहे. रंगभूषाकार विक्रम गायकवाड यांचं त्यासाठी कौतुक करायला हवं. एकंदरच ‘बेल बॉटम’ ही कलाकृती आवर्जून पाहावी अशी आहे. बेल बॉटम निर्मिती ः वाशु भगनानी, जॅकी भगनानी, दीपशिखा देशमुख, निखिल अडवानी दिग्दर्शक ः रणजीत तिवारी लेखन ः असीम अरोरा, परवेझ शेख कलाकार ः , , , लारा दत्ता, छायांकन ः राजीव रवी संकलन ः चंदन अरोरा दर्जा ः ३.५ स्टार
from Marathi Bollywood News, Marathi Cinema News https://ift.tt/3zhHdpz
