मुंबई : राष्ट्रीय पुरस्कार विजेती गायिका सावनी रवींद्र आणि तिचे पती डॉ. आशिष धांडे यांच्या घरी शनिवारी लक्ष्मीचे आगमन झाले. या दोघांना कन्यारत्न प्राप्त झाले आहे.तीन दिवसांपूर्वी सावनीने इन्स्टाग्रामवर पोस्ट केली होती. त्यामध्ये आपण बाळाच्या आगमनाची आतुरतेने वाट बघत असल्याचे सांगितले होते. मे महिन्यात सावनीने सोशल मीडियावर फोटो पोस्ट करत गरोदर असल्याची आनंदाची बातमी चाहत्यांना दिली होती. त्यानंतर तिने डोहळाजेवणाचे सुंदर फोटो सोशल मीडियावर शेअर केले होते. सावनीने तिच्या प्रेग्नेंसीच्या काळातामध्ये एक पोस्ट सोशल मीडियावर शेअर केली होती. त्यामध्ये तिने म्हटले होते की, ' माझ्या मनात सध्या खूप अलौकीक अशा भावना आहेत. ज्या मी शब्दांत व्यक्तही करू शकत नाही. आजवर मी गायिका म्हणून आईपणावर वेगवेगळ्या धाटणीची गाणी गायली आहेत. अंगाई गीत, डोहाळ जेवणाचे गीत, बारशाची गाणी मी या आधी गायली होती. पण आता मी स्वत: त्या भूमिकेत जाणार आहे. त्यामुळे आईपण अनुभवण्यासाठी मी खूप उत्सुक आहे...' अशी पोस्ट तिने लिहिली होती. तिने या पोस्टमध्ये आपल्या बाळाला लकी चार्म म्हटले आहे. तिने लिहिले की, 'माझं बाळ पोटात असताना मला माझ्या आयुष्यातील इतका मोठा प्रतिष्ठीत राष्ट्रीय पुरस्कार मिळाला. तसेच गेल्या सहा महिन्यात मी गरोदरपणात अनेक वेगवेगळे म्युझिक अल्बम, नविन गाणी, काही प्रोजेक्ट्स शूट केलेत. त्यातील बरीचशी गाणी रिलीज झाली. काही गाणी लवकरच रिलीज होणार आहेत...' सावनी आणि डॉ. आशिष धांडे यांचे २०१८ मध्ये लग्न झाले होते. आता त्यांच्या संसारवेलीवर लेकीच्या रुपाने एक सुंदर फूल उमलले आहे.
from Marathi Bollywood News, Marathi Cinema News https://ift.tt/2Vy93z1
