मुंबई : उत्तर प्रदेशातील लखीमपूर खेरी येथे शेतकऱ्यांना चिरडून मारल्याचा निषेधार्थ उद्या (११ ऑक्टोबर) महाराष्ट्रातील भाजपविरोधी राजकीय पक्षांच्यावतीने 'महाराष्ट्र बंद'ची हाक देण्यात आली आहे. या बंदला शिवसेनेसह राष्ट्रवादी कॉंग्रेस आणि कॉंग्रेस यांनी पाठींबा दिला आहे. मात्र दुसरीकडे या बंद काळात चित्रपट आणि टीव्ही मालिकांचे चित्रिकरण सुरू ठेवावे, अशी मागणी महाराष्ट्र नवनिर्माण चित्रपट कामगार सेनेतर्फे करण्यात आली आहे. मनसेने काय केलीये मागणी ? याबाबत महाराष्ट्र नवनिर्माण चित्रपट सेनेचे अध्यक्ष अमेय खोपकर यांनी संदेश जाहीर केला आहे. आपल्या संदेशात खोपकर यांनी म्हटले आहे की, 'लखीमपूर येथील दुर्दैवी दुर्घटना आणि शेतकरी आंदोलन याबद्दल आम्हाला नक्कीच सहानुभूती आहे. मात्र त्यासाठी ‘महाराष्ट्र बंद’ची हाक देणाऱ्या महाविकास आघाडीला विनंती आहे की, ११ ऑक्टोबरला चित्रपट, वाहिन्यांवरील मालिका यांचे चित्रीकरण सुरु ठेवावेत.' खोपकर पुढे म्हणतात की, “लॉकडाऊन काळात चित्रपट, नाटक व संबंधित तंत्रज्ञ, कामगार यांनी बंदमुळे बरंच भोगलंय. आता पुन्हा एक दिवस काम बंद ठेवले, तर आर्थिक नुकसान सोसावे लागेल. म्हणूनच पुकारलेल्या महाराष्ट्र बंदमध्ये चित्रीकरण थांबवू नयेत, ही तमाम चित्रपट इंडस्ट्रीतर्फे आम्ही मागणी करत आहोत. शासनाने या क्षेत्राचा गांभिर्याने विचार करावा.” कोरोनाच्या भीतीने चित्रीकरण होते बंद कोरोनाच्या पहिल्या आणि दुसऱ्या लाटेदरम्यान संसर्गाचा धोका होऊ नये म्हणून बहुतांश चित्रपट व मालिकांचे चित्रीकरण बंदच ठेवण्यात आले होते. कोरोनाच्या दुसऱ्या लाटेवेळी सरकारने टप्प्याटप्प्याने अनेक क्षेत्रांवरील निर्बंध शिथील करायला सुरुवात केली होती. मात्र चित्रीकरणावरील निर्बंध कायम ठेवले होते. त्यामुळे अनेक टीव्ही आणि चित्रपटांचे चित्रीकरण रखडले होते. त्यामुळे निर्मात्यांसह मनोरंजन क्षेत्रात काम करणाऱ्या प्रत्येक घटकाला त्याचा फटका सहन करावा लागला होता. या काळात अनेक मराठी आणि हिंदी मालिकांचे चित्रीकरण गुजरात, राजस्थानमध्ये करण्यात आले होते. त्यानंतर राज्य सरकारने महाराष्ट्रात चित्रीकरणाला परवानगी दिली होती.
from Marathi Bollywood News, Marathi Cinema News https://ift.tt/3uYI7FP
