मुंबई टाइम्स टीम विविध प्रकारच्या भूमिका साकारून आपली अभिनयक्षमता सिद्ध करण्यासाठी सज्ज आहे. नुकतीच ती 'अनकही कहानियां' या सीरीजमध्ये दिसली. यात तिनं मंजिरी नावाच्या एका साध्या आणि स्वप्नाळू मुलीची भूमिका साकारली. आपल्या आयुष्यात य़ेणाऱ्या प्रेमाचा शेवट हा गोड होतो का नाही, अशा धाटणीच्या या गोष्टीत रिंकूनं साकारलेली ही हळवी युवती कौतुक मिळवून गेली. तिनं आतापर्यंत साकारलेल्या भूमिकांपेक्षा ही भूमिका आव्हानात्मक होती; कारण यात तिला मूळ व्यक्तिमत्त्वापेक्षा वेगळं काही साकारायचं होतं. अशाच भूमिका कलाकारांना आव्हान देतात, असं रिंकूला वाटतं. 'सैराट'नंतर 'नूरजहाँ', 'कागर', 'मेकअप', 'अनपॉझ्ड', 'आठवा रंग प्रेमाचा' या कलाकृतींनंतर तिच्या आगामी 'झुंड' या चित्रपटाविषयी उत्सुकता आहे. संधी मिळत गेल्या...'सैराट'नंतर एकाच चौकटीत अडकण्याची भीती असूनही, रिंकूनं वेगळ्या भूमिका निवडत आपली वाट वेगळी असल्याचं दाखवून दिलं. त्यासाठी तिचं कौतुक झालं. अभिनेत्री म्हणून प्रवास सुरू असताना, तिला बॉलिवूडमधल्या उत्तम दिग्दर्शकांसोबत काम करायची संधी मिळाली. त्याबद्दल ती सांगते, 'मी स्वतःला भाग्यवान समजते, की ही संधी मला फारच कमी वयात मिळाली. अनेक लोकांची उत्तमोत्तम दिग्दर्शकांसोबत काम करायची इच्छा असते. माझी ही इच्छा लवकर पूर्ण झाली आणि होत आहे, याचा खूप आनंद वाटतो. या मंडळींसोबत काम करताना जेवढी उत्सुकता तितकीच भीतीही असते, की अमुक व्यक्तीचा स्वभाव नेमका कसा असेल. त्यात मोठ्या दिग्दर्शकांबद्दल असं म्हटलं जातं, की ते सेटवर आरडाओरडा करतात; त्यामुळे माझ्याही मनात थोडी ही भीती होती. मला आतापर्यंत सगळ्यांकडून उत्तम मार्गदर्शन मिळालं आहे.' इमेज बदलायची नाही... 'सैराट' या पहिल्याच चित्रपटानं रिंकूला प्रेक्षकांचं प्रेम मिळवून दिलं आणि चाहतावर्गही. आता नवनव्या भूमिकांमधून चाहत्यांसमोर येताना, ती आधीची इमेज बदलायचा विचार करते का, असं विचारताच ती त्यावर वेगळं मत मांडते. रिंकू म्हणाली, 'मी कधीच कोणतीही इमेज बदलायला जात नाही. माझी प्रत्येक भूमिका ही उठावदार आणि वेगळी असावी, प्रेक्षकांनी मला नव्या भूमिकांमध्ये बघावं, त्या भूमिकांवर प्रेम करावं, असं मला वाटतं. त्यासाठी मी साकारलेल्या जुन्या भूमिका विसरून जाव्यात, असं मात्र वाटत नाही आणि ते पटतही नाही. मला अजूनही माझ्या जुन्या भूमिकेमुळे ओळखलं जातं, हे नेहमीच छान वाटतं. आपल्या जुन्या कामातूनच आपल्याला नवं काम मिळतं, मग ते विसरून कसं चालेल? माझ्या प्रत्येक कामातून मी स्वतःला आणि प्रेक्षकांना काही तरी नवं देण्याचा विचार करत असते.' ते नेहमीच महान... आतापर्यंतच्या अनुभवातून आपल्याला काय हवंय आणि नको, याबद्दल ठाम असल्याचं रिंकू सांगते. अशा वेळी वेगवेगळ्या टीम, लोकांच्या मनातील स्वतःच्या इमेजचा ताण अनेकांना येतो. त्यावर तू कशी मात करतेस असं विचारल्यावर रिंकू सांगते, 'दर वेळी काम करताना मनात कुठं तरी भीती आणि दडपण असतंच; पण मी त्यात वाहवत जात नाही. नाही तर माझ्याकडून कोणतंच काम शंभर टक्के होणार नाही.' भूमिकांची निवड असो किंवा स्वतःचं प्रमोशन असो आताच्या कलाकारांची पिढी अधिक सरस आहे, असं वाटतं का, यावर ती सांगते, 'आधीची आणि आताची अशी वेगळी पिढी आणि त्यातही कोणती सरस आहे, कोणती नाही, असा विचार मला करावासा वाटत नाही. कलाकारांच्या प्रत्येक पिढीसमोरची परिस्थिती काळानुरूप वेगळी असते. आधीच्या पिढीचे कलाकार हे कायमच महान असणार आहेत आणि मी त्यांच्याकडूनच प्रेरणा घेते. मुळात अशी तुलना होऊच शकत नाही.'
from Marathi Bollywood News, Marathi Cinema News https://ift.tt/3mFtbc0
