मुंबई- आपल्या अदांनी आणि सौंदर्याने चाहत्यांना घायाळ करणारी लोकप्रिय मराठमोळी अभिनेत्री सोशल मीडियावर प्रचंड सक्रिय असते. नुकतीच शारदीय नवरात्रोत्सवाला सुरुवात झाली आहे. नवरात्र आली की अनेक अभिनेत्री हटके स्वरूपात फोटोशूट करत असतात. चाहतेही आपल्या लाडक्या अभिनेत्रींच्या या अनोख्या रुपाला पाहण्यासाठी उत्सुक असतात. तेजस्विनी सलग तीन वर्ष निरनिराळ्या रूपात प्रेक्षकांच्या भेटीस येत होती. या वर्षी तेजस्विनी काय वेगळं करणार याकडे चाहत्यांचा लक्ष लागलं होतं. परंतु, या वर्षी तेजस्विनी तिच्या निर्मिती संस्थेच्या कामात व्यग्र असल्यामुळे ती नवरात्रीच्या निमित्ताने काही वेगळं करू शकली नाही. यासाठी तेजस्विनीने पोस्ट करत चाहत्यांची माफी मागितली आहे. इन्स्टाग्रामवर पोस्ट करत तेजस्विनीने लिहिलं, 'नमस्कार! कसे आहात? सगळ्यांना नवरात्रोत्सवाच्या हार्दिक शुभेच्छा! सगळ्यात आधी तुमचे मनापासून आभार आणि माफी सुद्धा! आभार तुम्ही दाखवलेल्या विश्वासाबद्दल की गेल्या तीन वर्षांप्रमाणे याही वर्षी मी नवरात्री निमित्त खास फोटो, संदेशांच्या माध्यमाने तुम्हाला भेटायला येईन. पण माफी यासाठी की ते या वर्षी शक्य झालं नाही.' 'दोन दिवस आधीपासूनच तुमचे असंख्य मेसेज मला मिळत होते आणि कुठेतरी मनाला सुखावतही होते, आजच्या क्षणार्धात बदलणाऱ्या जगात तुम्ही माझ्या कलाकृतींची नोंद ठेवलीत हा माझा बहुमान आहे. पण तरीही या वर्षी मी कोणतीच संकल्पना साकारली नाही. अर्थात याची अनेक कारणं देखील आहेत आणि त्यातलं सगळ्यात महत्वाचं कारण म्हणजे माझा नवनिर्मितीचा ध्यास.' 'माझ्या निर्मिती संस्थेकडून तुमच्यासाठी दर्जेदार कलाकृती घेऊन लवकरच येते आहे आणि माझ्यावर विश्वास ठेवा ते मुळीच सोपं नाहीये. असं म्हणतात कोणतीच गोष्ट अर्धवट मनाने करू नये आणि रसिक प्रेक्षकांसाठी तर नाहीच नाही. म्हणूनच या वर्षी जरा थांबण्याचा निर्णय घेतला.' पुढे तेजस्विनीने लिहिलं, 'पण लक्षात घ्या हा पूर्ण विराम नाही, अर्ध विराम आहे आणि अर्धविराम पुढील वाक्याचा अर्थ अजून वाढवतो. तेव्हा पुढच्या वर्षी अजून दमदार संकल्पनेसह तन, मन, धन अर्पून तुमच्या समोर येईन. या वर्षी माझी संकल्पना जरी तुमच्या समोर आली नसली तरी माझ्या अनेक चाहते, अनुयायी, सहरंगकर्मींनी प्रेरणेची ही मशाल पुढे धगधगत ठेवली आहे आणि याचा मला मनापासून आनंद आहे. तेव्हा पुन्हा एकदा आभार आणि माफी पुन्हा एकदा !!! आणि ठाम विश्वास की हो पुढच्या वर्षी नक्कीच भेटू.' तेजस्विनीची नवी संकल्पना जरी चाहत्यांना पाहायला मिळाली नसली तरी तिच्या पुढील प्रोजेक्ट मधून तेजस्विनी काय नवीन दाखवणार याची प्रेक्षकांना उत्सुकता आहे.
from Marathi Bollywood News, Marathi Cinema News https://ift.tt/3lmJjQb
