मुंबई- बॉलीवूडला आपल्या उत्कृष्ट अभिनयाने भुरळ पाडणाऱ्या अभिनेत्री पुन्हा एकदा सोशल मीडियावर चर्चेत आहेत. नीना यांनी लिहिलेल्या 'सच कहू तो' या पुस्तकात त्यांच्या आयुष्यामधील अशा गोष्टींचा खुलासा केला ज्या ऐकून चाहत्यांना देखील धक्का बसला. या पुस्तकात नीना यांनी त्यांचं कुटुंब, नाती, अफेअर, प्रेम, लग्न या सगळ्याबद्दल अनेक खुलासे केले. या पुस्तकात नीना यांनी त्यांच्या अभिनय क्षेत्रातील करिअर आणि मुलीबद्दलही बऱ्याच गोष्टी लिहिल्या आहेत. परंतु, आता दिलेल्या एका मुलाखतीत नीना यांनी त्यांच्या आई- वडिलांच्या नात्याबद्दल सांगितलं आहे. नीना यांनी एका वेबसाइटला दिलेल्या मुलाखतीत त्यांच्या पुस्तकावर चर्चा केली. नीना त्यांच्या आईबद्दल सांगताना म्हणाल्या,'माझ्या वडिलांनी दोन लग्न केली. त्यामुळे त्यांची दोन कुटुंब होती. या दोन्ही कुटुंबांसाठी ते धावपळ करायचे. ते त्यांच्या दुसऱ्या कुटुंबासोबत रात्र घालवत. आमच्यासोबत ते नसत. त्यांच्या सुट्ट्यादेखील दोन कुटुंबांमध्ये विभागल्या जायच्या. त्यांच्या या गोष्टीमुळे माझ्या आईला खूप दुःख व्हायचं पण ती याबद्दल कधीही कुणाशी बोलली नाही. ती आतल्या आत कुढत राहिली. माझ्या वडीलांनी आईसोबत जे केलं ते लपवण्यासाठी माझ्या आईने स्वतःला मारलं. मला वाटतं मी त्यामुळेच हे पुस्तक लिहिलं.' पुढे नीना म्हणाल्या, 'माझी आई, वडील, भाऊ, वहिनी कुणीही आता जिवंत नाही. जर माझ्या कुटुंबातील कुणीही आता जिवंत असतं तर मी हे पुस्तक लिहू शकले नसते खासकरून आई. म्हणूनच मी हे पुस्तक आता लिहिलंय.' नीना यांना त्यांच्या आईच्या अवस्थेबद्दल नेहमीच वाईट वाटत आलं आहे. याचा उल्लेख त्यांनी पुस्तकात देखील केला आहे. नीना यांनी २०१८ साली प्रदर्शित झालेल्या 'बधाई हो' चित्रपटातून मोठ्या पडद्यावर धमाकेदार रित्या पुन्हा पदार्पण केलं. सध्या नीना 'गुडबाय' चित्रपटाचं चित्रीकरण करत आहेत.
from Marathi Bollywood News, Marathi Cinema News https://ift.tt/3DvKbIz
