मुंबई: टुमदार घराबरोबरच स्वतःच्या मालकीची गाडी असावी असे स्वप्न प्रत्येकाचे असते. याला कलाकार मंडळी देखील अपवाद नसतात. त्यामुळेच दिवाळीमध्ये अनेक मराठी कलाकारांनी त्यांचे गाडीचे स्वप्न प्रत्यक्षात आणले आहे. आपल्या कुटुंबात आगमन झालेल्या या नवीन सदस्याचे त्यांनी उत्साहात स्वागत करत त्याच्या सोबतचे फोटो त्यांनी तितक्याच उत्साहाने शेअर देखील केले आहे. या कालाकरांमध्ये अभिनेता , अभिनेत्री यांचाही समावेश आहे. तुझ्यात जीव रंगला आणि तुझ्या माझ्या संसाराला आणि काय हवं मालिकेमुळे घराघरात अभिनेता हार्दिक जोशी लोकप्रिय झाला आहे. या दिवाळीमध्ये हार्दिकचे अनेक वर्षांपासून पाहिलेले स्वप्न प्रत्यक्षात साकार झाले आहे. त्यामुळे यंदाची दिवाळी हार्दिकसाठी ख-या अर्थाने खास होती. कारण हार्दिकने महिंद्रा बलेरो ही आलिशान गाडी घेतली आहे. ही गाडी घेतल्यामुळे हार्दिक कमालीचा आनंदित झाला आहे. त्याने गाडी घेतानाचे फोटो सोशल मीडियावर शेअर केले आहे. हे फोटो शेअर करताना त्याने लिहिले आहे, 'आमच्या कुटुंबामध्ये माझ्या सर्वोत्तम मित्राचे स्वागत...' 'तुझ्यात जीव रंगला' याच मालिकेतील बरकत ही भूमिका साकारलेला अभिनेता अमोल नाईक याने देखील या दिवाळीमध्ये नवीन गाडी घेतली आहे. गाडी घेतानाचे फोटो, व्हिडिओ त्याने सोशल मीडियावर आपल्या चाहत्यांसाठी शेअर केले आहेत. हे फोटो शेअर करताना अमोलने लिहिले आहे, 'वॅगी तुझे आमच्या कुटुंबात मनापासून स्वागत...' 'देवा श्री गणेशा' मालिकेतील अभिनेत्री भाग्यश्री मोटे हिने देखील या दिवाळीमध्ये नवीन गाडी घेतली आहे. ही तिने खरेदी केलेली पहिली वहिली गाडी असल्याने ती खूपच उत्साहित होती. भाग्यश्रीने गाडीची पूजा करतानाचे फोटो सोशल मीडियावर शेअर केले आहे. हे फोटो शेअर करताना तिने लिहिले आहे की, 'यंदाच्या दिवाळीतील पाडवा माझ्यासाठी खरोखरच खास आहे. यंदा माझी स्वतःची गाडी आली. अखेर मला हे करता आले.' सुख म्हणजे नक्की काय असते मालिकेतील अभिनेत्री गिरीजा प्रभू हिची दिवाळी देखील स्पेशल होती. तिने दिवाळीच्या आधीच नवीन गाडी घेतली. त्यामुळे यंदाची ही दिवाळी तिने तिच्या घरी आलेल्या नवीन सदस्यासोबत अतिशय उत्साहात साजरी केली. गाडीसोबतचे फोटो गिरीजाने सोशल मीडियावर आपल्या चाहत्यांसाठी शेअर केले आहेत. हे फोटो शेअर करताना तिने लिहिले आहे की, 'जेव्हा तुमचे स्वप्न सत्यात येतात तेव्हा होणारा आनंद अवर्णनीय असतो.' 'शुभमंगल ऑनलाईन' मालिकेमुळे लोकप्रिय झालेली अभिनेत्री सायली संजीव हिने देखील यंदाच्या दिवाळीमध्ये नवीन गाडी घेतली. त्यामुळे तिची दिवाळी देखील खास होती. गाडी घेण्याचे सायलीचे अनेक वर्षांपासूनचे स्वप्न यंदाच्या दिवाळीत साकार झाल्यामुळे ती खूपच आनंदात होती. सायलीने नवीन गाडी घेतानाचे फोटो सोशल मीडियावर आपल्या चाहत्यांसाठी आवर्जून शेअर केले आहेत. हे फोटो शेअर करताना तिने लिहिले आहे की, 'एका स्वप्नाने सर्व गोष्टींची सुरुवात झालेली.'
from Marathi Bollywood News, Marathi Cinema News https://ift.tt/3mXuK6H
