मुंबई: अभिनेत्री ऐश्वर्या राय-बच्चन हिची २०१६च्या ‘’शी संबंधित एका प्रकरणात अंमलबजावणी संचालनालयाकडून (ईडी) चौकशी करण्यात आली. सुपरस्टार अमिताभ बच्चन यांची सून असलेल्या ४८ वर्षीय ऐश्वर्याची परकीय चलन व्यवस्थापन कायद्यातील (फेमा) तरतुदीअंतर्गत चौकशी करून तिचा जबाब नोंदवण्यात आल्याची माहिती आहे. ईडी चौकशीनंतर ऐश्वर्यानं कोणतही वक्तव्य केलं नसलं तरी या चौकशीनंतर तिनं शेअर केलेली सोशल मीडिया पोस्ट चर्चेत आली आहे. ऐश्वर्यानं आई वृंदा रॉय आणि दिवंगत वडील कृष्णराज रॉय यांचा एक फोटो शेअर केलाय. हा फोटो शेअर करत ऐश्वर्यानं आई-वडिलांना लग्नाच्या वाढदिवसाच्या शुभेच्छा दिल्या आहेत. 'तुम्ही दिलेल्या प्रेमासाठी आणि आशिर्वादसाठी खूप धन्यवाद' असं ऐश्वर्यानं तिच्या पोस्टमध्ये म्हटलं आहे. का करण्यात आली ऐश्वर्याची चौकशी?२०१६मध्ये पनामातील मोझॅक फोन्सेका या कायदेविषयक कंपनीशी संबंधित गुप्त कागदपत्रे वॉशिंग्टनस्थित ‘इंटरनॅशनल कन्सॉर्शिअम ऑफ इन्व्हेस्टिगेटिव्ह जर्नलिस्ट्स’ (आयसीआयजे) या शोधपत्रकारांच्या गटानं ‘पनामा पेपर्स’ नावानं उघड केली होती. यात जगभरातील अनेक नेते आणि कलावंतांच्या नावांचा समावेश होता. या सर्वांनी कर चुकवण्यासाठी परदेशी कंपन्यांमध्ये पैसे गुंतवल्याचा आरोप आहे. ‘आयसीआयजे’तर्फे उघड करण्यात आलेल्या दस्तावेजांमध्ये भारताशी संबंधित एकूण ४२६ प्रकरणांचा समावेश असून, ‘ईडी’ यासंबंधी बच्चन परिवाराची २०१६-१७पासून चौकशी करत आहे. या संदर्भात बच्चन परिवाराला नोटीस बजावून भारतीय रिझर्व्ह बँकेची मुक्त हस्तांतरण योजना (एलआरएस) आणि ‘फेमा’अंतर्गत २००४पासून केलेल्या परदेशी हस्तांतरणाबाबत स्पष्टीकरण देण्यास सांगण्यात आलं होतं. त्यानुसार बच्चन कुटुंबीयांकडून ‘ईडी’ला काही कागदपत्रे सादर करण्यात आली आहेत. या परिवाराशी संबंधित काही कथित आर्थिक अनियमिततेबाबतही ‘ईडी’कडून तपास सुरू असल्याची माहिती आहे. ‘पनामा पेपर्स’नुसार, ऐश्वर्याचा २००५मध्ये स्थापन झालेल्या ब्रिटिश व्हर्जिन आयलँड्स (बीव्हीआय) कंपनीशी संबंध आहे. ५० हजार अमेरिकी डॉलरचे प्रारंभिक अधिकृत भांडवल असलेल्या या कंपनीत तिच्या परिवारही सहभाग असल्याचं सांगण्यात येत आहे. अर्थात, २००८मध्ये ही कंपनी बंद करण्यात आल्याचे सूत्रांचे म्हणणे आहे.
from Marathi Bollywood News, Marathi Cinema News https://ift.tt/3FuIdd2