अभिनेत्री अपूर्वा नेमळेकरच्या, युट्यूबवरील 'अशी मी, तशी मी'चे सध्या विविध भाग प्रेक्षकांच्या चांगलेच पसंतीस उतरत आहेत. पण, अपूर्वा त्यातलं कोणतं पात्र साकारेल, ते काय बोलेल, या आणि अशा अनेक गोष्टींसाठी लेखन करणारा चेहरा मात्र क्वचितच कोणाला माहीत असावा. अपूर्वा आणि श्रीकला हट्टंगडी यांच्या डोक्यात एक कल्पना आली आणि त्याला जोड मिळाली ती विनोदच्या लेखनाची. त्यातून अपूर्वाचं हे युट्यूब चॅनल सुरू झालं. 'महाराष्ट्राची हास्यजत्रा' या धमाल विनोदी कार्यक्रमातील विनोदी स्किटवर आपण खळखळून हसतो. पण, त्यातील अनेक भूमिकांना बोलतं कोण करतंय हे अनेकांना माहीत नसेल. आंतरमहाविद्यालयीन एकांकिका स्पर्धांतील एकांकिकांचं लेखन, दिग्दर्शन, नाट्य दिग्दर्शन, अभिनय अशी त्याची गेल्या अनेक वर्षांपासून यशस्वी घौडदौड सुरू आहे. शब्दांकन- अजय उभारेनावाप्रमाणेच 'विनोद' ही त्याची खासियत. अभिनेता, लेखक आणि दिग्दर्शक अशा भूमिका पार पाडत प्रेक्षकांच्या मनोरंजनासाठी तत्पर असणारं व्यक्तिमत्त्व म्हणजे विनोद गायकर. विनोदी लेखन ही विनोदची खरी ओळख असं म्हणणं चुकीचं ठरणार नाही. परंतु, एकांकिका, नाटकं, युट्यूब आणि विनोदी कार्यक्रम या प्रत्येक माध्यमासाठी केलं जाणारं लेखन आणि त्यासाठी समोर असलेली आव्हानं वेगवेगळी असतात. प्रत्येक गोष्टीचा आणि माध्यमावरील नियमांचा लेखक म्हणून विचार करून मगच त्या गोष्टी लिखणात उतरवता येत असल्याचं तो म्हणतो.
'हसवणं आपल्याला सोपं वाटतं असलं, तरी ते तितकंसं सोपं नसल्याचं विनोद सांगतो. 'लोकांना रडवणं जेवढं सोपं आहे, त्याहून अधिक हसवणं कठीण आहे. त्यामुळे प्रत्येक पात्र उभं करताना किंवा त्याच्यासाठी विनोदी संवाद लिहिताना त्याचा सर्वाधिक विचार करावा लागतो. कलाकार आणि प्रेक्षक अशा दोन्ही बाजूंचा विचार करूनच गोष्ट कागदावर उमटते. बऱ्याचदा घरी लेखन करताना अनेकदा मी एकटाच हसतो किंवा विचार करत बसतो. घरच्यांनाही माझ्यातल्या विनोदी लेखकाची सवय झाली आहे', असं विनोद आवर्जून सांगतो.
युट्यूबवर फारसे कठोर नियम नसल्यामुळे तिथे कोणत्याही प्रकारची बंधनं येत नाही. पण, टीव्हीवर लेखन करताना मात्र सगळ्याचा सारासार विचार करून आणि नियमांच्या चौकटीत राहूनच विनोद लिहावा लागतो. 'महाराष्ट्राची हास्यजत्रा' कार्यक्रमासाठी गेली दीड-दोन वर्ष विनोद लिखाण करत आहे. लवकरच, स्किट्सच्या लिखाणाची शंभरी पूर्ण होणार असल्याचं विनोदनं सांगितलं. लेखन ही केवळ एकट्यानं करण्याची गोष्ट नव्हे. त्यासाठी अनेकांशी चर्चा, विचारांची देवाणघेवाण होणं गरजेचं असतं आणि म्हणूनच 'रायटर मीटिंग'मधून अनेक गोष्टी शिकता येतात, असं तो नमूद करतो.
'हास्यजत्रा'साठी लेखन करत असताना सचिन मोटे आणि सचिन गोस्वामी सर यांचं मार्गदर्शन मिळतं. तर प्रत्येक लेखक मित्राकडून मिळणारे अनुभव अधिक समृद्ध करून जातात, असं तो सांगतो. लेखक, दिग्दर्शक आणि अभिनेता या तीनही भूमिका जमत असल्या, तरी यापैकी काही निवडायचं असेल तर ते कठीण होतं. अनेक गोष्टींची आपल्याला तुलना करता येत नाही. माझी सगळी कामं ही तुलनेपलीकडची असल्यामुळे माझं माझ्या कामावर प्रचंड प्रेम असल्याचं विनोद सांगतो.
वेगवेगळ्या माध्यमांपेक्षा वेगवेगळ्या लोकांबरोबर काम करायला विनोदला आवडतं. आपल्याला अनेक गोष्टी येतात म्हणून आपण सगळ्या दगडांवर पाय ठेवणं योग्य नाही असं वाटत असलं, तरी आजुबाजूच्या ऑलराउंडर मित्रांकडे पाहत, आपणही तसं असण्यात काही गैर नाही असं मानून तो सगळ्या क्षेत्रात रमतोय. विनोदनं लेखन केलेली आणि दिग्दर्शित केलेली 'बॅक बेन्चर्स' लवकरच प्रेक्षकांच्या भेटीला येणार आहे.
from Marathi Bollywood News, Marathi Cinema News https://ift.tt/2EcHSAT
