स्वतः बनवणार राखी प्रत्येक सण आपल्या कुटुंबियांबरोबर साजरा करायला हवं असं मला नेहमीच वाटतं. आयुष्यातल्या या सुंदर क्षणांचा मनापासून आनंद घ्यायला हवा. त्यामुळे सणाच्या दिवशी मी चित्रिकरणातून आवर्जून सुट्टी घेते. यावर्षी तर राखीपौर्णिमेच्या दिवशी आम्ही सगळेच घरी आहोत. मी आणि माझी बहीण आम्ही मिळून भावासाठी घरच्याघरी राखी तयार करणार आहोत. रिबीन्स आणि घरात उपलब्ध असलेलं साहित्य वापरून काहीतरी नाविन्यपूर्ण करण्याचा आमचा प्रयत्न आहे. हा प्रयत्न यशस्वी झाला, तर स्वतः तयार केलेल्या राख्या आम्ही श्रीयशच्या हाताला बांधणार आहोत. जर आमचा प्रयत्न फसलाच, तर गेल्या वर्षीच्या काही राख्याही आमच्याकडे आहेत. या जपून ठेवलेल्या राख्या यंदा उपयोगी पडतील. - पूजा सावंत ऑनलाइन कल्ला सध्या मी दुबईत अडकले आहे. इथूनच मी माझ्या सर्व भावांना राखी पाठवली आहे आणि ती त्यांना मिळलीही आहे. कुलकर्णी घराण्यात मी एकटी मुलगी आहे. म्हणजे सात भावांना मिळून एकटीच बहीण आहे. त्यामुळे साहजिकच माझे खूप लाड होतात. यावर्षी राखी पौर्णिमेला भावांची ऑनलाइन भेट घेणार आहे. आम्ही सगळेजण व्हिडीओ कॉलिंगच्या माध्यमातून एकत्र भेटून व्हर्च्युअल कल्ला करणार आहोत. एकमेकांना वेळ देत मस्त गप्पा मारत टाइमपास करायचा असं आम्ही ठरवलं आहे. यावर्षीची ओवाळणी भारतात परत आल्यावर भावांकडून मिळेलच. भाऊ मला काय गिफ्ट्स देणार याची मला उत्सुकता आहे. -सोनाली कुलकर्णी बहिणीला राखी माझे सगळे आतेभाऊ, मामेभाऊ कामानिमित्त वेगवेगळ्या देशात, इतर शहरांमध्ये राहतात. राखी पौर्णिमेच्या दिवशी सहसा कुणाची भेट होत नाही. म्हणून मग मी आणि माझ्या सख्ख्या बहिणीनं आपणच एकमेकींना राखी बांधायची असं ठरवलं. गेल्या चार-पाच वर्षांपासून मी माझ्या बहिणीला, चैत्रालीलाच राखी बांधते. राखी बांधणं म्हणजे एकमेकींची काळजी घेणं, पाठीशी ठामपणे उभं राहणं. खरं तर मी आणि चैत्राली अगदी एकमेकींच्या समोरच्या इमारतीत राहतो. हल्ली भाजी आणायला म्हणून आम्ही दोघी एकत्र उतरतो. म्हणजे त्यानिमित्तानं तरी बोलणं होतं. सध्या दोघींच्याही इमारतीत इतर लोकांना येण्यास बंदी आहे. त्यामुळे यंदा खाली रस्त्यात भेटूनच राखी बांधावी लागणार आहे. सर्वतोपरी काळजी घेऊन केलेलं हे एक आगळंवेगळं सेलिब्रेशन असणार आहे. - भार्गवी चिरमुले खंदा आधार यावर्षीच्या रक्षाबंधनाला मी माझ्या भावाला भेटणार आहे. एक तर तो मला भेटायला येईल किंवा मी त्याला भेटायला पुण्याला जाणार आहे. आम्ही दोघांनीही इ पासची तयारी केली आहे. एकूण परिस्थितीचा अंदाज घेऊन, कोणी कोणाकडे जायचं हे आम्ही ठरवणार आहोत. दरवर्षीप्रमाणे भावाला ओवाळून राखी बांधणार आहे. माझा भाऊ अभिजित खरंच खूप हुशार आहे. तो वयानं माझ्यापेक्षा लहान असला, तरी त्याचा मला खूप आधार आहे. आयुष्यातले महत्त्वाचे निर्णय घेताना आम्ही नेहमी एकमेकांचं मत विचारात घेतो. मनातलं सगळं अगदी मोकळेपणाने मी त्याला सांगू शकते. माझा मोबाइल रिचार्ज करणं, विम्याचा हप्ता भरणं ही सगळी कामं मी न सांगताच तो स्वतःहून माझ्यासाठी करत असतो. यावर्षीच्या राखी पौर्णिमेला एकमेकांसोबत वेळ घालवण्याचा आमचा मानस आहे. - मृणाल दुसानिस खास भेटवस्तू माझा भाऊ शंतनू माझ्यापेक्षा वयानं मोठा आहे. पण, मी त्याला कधीच दादा म्हणून हाक मारलेली नाही. उलट मीच त्याची ताई असल्यासारखी वागत आले आहे. खरं तर आम्ही खूप जवळचे मित्र आहोत. या वर्षी मला त्याला भेटायला नाशिकला जाता येणार नाहीय. मी त्याच्यासाठी राखी आणि एक खास भेटवस्तू पाठवली आहे. गिफ्ट म्हणून धमाल कॅरिकेचर्स असलेला एक कॉफीचा मग त्याला पाठवला आहे. लहानपणी आम्हा दोघांनाही टीव्हीचा रिमोट हवा असायचा. आम्ही खूप भांडायचो. पण, कितीही भांडलो, तरी आमचं एकमेकांवर खूप प्रेम आहे, असा संदेश त्या विशेष मगवर आहे. माझ्या नुसत्या आवाजावरून मी कशी आहे, हे शंतनुला कळतं. आमचं नातं तितकं घट्ट आहे. -सायली संजीव शब्दांकन - गौरी आंबेडकर, रुईया कॉलेज बहीण-भावांच्या जोड्या पूजा सावंत - श्रीयश सावंत भार्गवी चिरमुले - चैत्राली गुप्ते सोनाली कुलकर्णी - अतुल कुलकर्णी मृणाल दुसानिस - अभिजित दुसानिस सायली संजीव आणि भाऊ शंतनू
from Marathi Bollywood News, Marathi Cinema News https://ift.tt/33ii7tm
