मुंबई टाइम्स टीम विसर्जन सुपारीचं घरी गणपती आणण्याची प्रथा आमच्याकडे पूर्वीपासून नव्हती. काही वर्षांपूर्वी आम्ही घरी दीड दिवस गणपतीची प्रतिष्ठापना सुरू केली. आमच्या गणपती बाप्पाचं आम्ही विसर्जन नाही करत. त्याऐवजी आम्ही सुपारीचं विसर्जन करतो, तेही घरच्या तुळशीच्या कुंडीत. विसर्जनाच्या वेळी वाजतगाजत गणपतीची मूर्ती घराबाहेर नेतो आणि पुन्हा घरात आणून ठेवतो. यंदा गणेशोत्सवानिमित्त काही विशेष करत नसलो, तरी सगळं काही लवकरात लवकर व्यवस्थित होऊ दे अशी प्रार्थना करतो आहे.- हेमंत ढोमे शाडूचीच गणेशमूर्ती आमच्याकडे गौरी-गणपती असल्यामुळे सात दिवस गणपती असतात. माझ्या सासऱ्यांचे दोन भाऊ असल्यानं दरवर्षी कुटुंबियांपैकी एकाकडे गणपती येतात. एका वर्षी आमच्याकडे, तर दुसऱ्या वर्षी दुसऱ्या काकांकडे. गेली अनेक वर्षं शाडूचीच गणेशमूर्ती आम्ही आणतो आहोत. गणपतीच्या निमित्तानं एक वेगळीच लगबग असते घरामध्ये. दरवर्षी आवर्जून शाडूच्या मातीचा गणपती आणण्या मागचं कारण की पर्यावरणरक्षण ही आपली जबाबदारी आहे. यंदाचा गणेशोत्सव आम्ही कुटुंबीय अगदी साधेपणानं साजरा करणार आहोत. दरवर्षीप्रमाणे गणेशाचं विसर्जनही पर्यावरणपूरकच होईल.- श्रुती मराठे नैसर्गिक सजावट गेली वीस वर्षं माझ्या घरी गणपती येत आहेत. यंदाचा गणेशोत्सव फार साध्या आणि पारंपरिक पद्धतीनं आम्ही साजरा करत आहोत. गणपतीची मूर्ती शाडूची असते. आम्ही जी सजावट करतो, तीसुद्धा पर्यावरणपूरक आणि नैसर्गिक असेल यावर खास लक्ष असतं. दरवर्षी काही ना काही नवीन, कल्पक सजावट मी करत असतो.- उमेश जाधव मातीपासून मूर्ती आता पर्यंत गेली अठरा वर्षं माझ्या घरी गणपती येतोय. दरवर्षी आम्ही घरी माती आणून गणेशमूर्ती तयार करतो. आम्ही कुटुंबातील सगळी मंडळी प्रत्येकाची वेगळी गणेशमूर्ती तयार करतो. ज्याची मूर्ती सर्वोत्कृष्ट झाली असेल, त्या मूर्तीची प्रतिष्ठापना आम्ही करतो. या निमित्तानं आपल्यामध्ये असलेल्या कल्पकतेला वाव मिळतो. यावर्षी मी तयार केलेल्या गणेशमूर्तीची प्रतिष्ठापना आम्ही करणार आहोत, याचा आनंद आहे. सजावटीसाठी नेहमीप्रमाणेच सर्व नैसर्गिक गोष्टींचा वापर आम्ही केला आहे. लहान-लहान रोपट्यांची आरास आम्ही तयार केली आहे. - रवी जाधव आठवणींत राहतात खेळणी यंदा आमच्या घरच्या गणपतीचं हे पाचवं वर्ष आहे. सध्याची एकंदरच नाजूक परिस्थिती बघता यावर्षी आमच्या घरचा गणपती पुण्यामध्ये असणार आहे. माझी आई उत्तम कलाकार आहे. आणि ती दरवर्षी गणपतीची मूर्ती घरी तयार करते. आता सरावामुळे अनेक बारकाव्यांसह ती गणेशमूर्ती तयार करते. यावर्षी तिच्या काही मैत्रिणींसाठीही तिनं गणेशमूर्ती तयार केल्या आहेत. आईचं बघून आजीनंही एक छोटी मूर्ती तयार केली आहे. मध्यंतरी घरी गेलो होतो तेव्हा मीसुद्धा मूर्ती रंगवण्यामध्ये हातभार लावला. गणेशमूर्तीचं घरच्याघरी विसर्जन केल्यावर आई त्या मातीपासून छोटी-छोटी खेळणी तयार करते. या खेळण्यांच्या रूपानं प्रत्येक वर्षीच्या बाप्पाची आठवण आम्ही जपून ठेवली आहे. - भूषण प्रधान पहिलाच प्रयत्न यावर्षीचा गणेशोत्सव माझ्यासाठी खूप स्पेशल आहे. लग्नानंतर प्रथमच मी आणि माझा नवरा आमच्या मुंबईच्या ऑफिसमध्ये गणपती आणणार आहोत. लॉकडाउनमध्ये मिळालेल्या वेळेचा सदुपयोग करून मी स्वतः पहिल्यांदाच गणेशमूर्ती तयार केली आहे. युट्यूबवरचे व्हिडीओज बघून साधारण अंदाज घेतला. माझा मित्र भूषण प्रधानची आई दरवर्षी गणेशमूर्ती घरीच तयार करते. मी फोनवरुन त्यांचं मार्गदर्शन घेतलं. हा माझा पहिला प्रयत्न बऱ्यापैकी यशस्वी झालाय असं म्हणता येईल. गणरायाला खऱ्या कापडाचं सोवळं आणि फेटा घातला आहे. 'येस आय कॅन डू इट' हा आत्मविश्वास मला बाप्पानं दिला आहे. - प्रार्थना बेहेरे
from Marathi Bollywood News, Marathi Cinema News https://ift.tt/3hiJO9u
