मुंबई- आज विराट कोहलीचा वाढदिवस आहे. टीम इंडियाचा कर्णधार आज त्याचा ३२ वा वाढदिवस साजरा करत आहे. विराट कोहली जगातील एकमेव फलंदाज आहे ज्याने सलग चार मालिकांमध्ये दुहेरी शतक झळकावलं. २०१७ मध्ये त्याने अभिनेत्री अनुष्का शर्माशी राजेशाही थाटात लग्न केलं. लवकरच हे स्टार कपल पहिल्यांदा आई- बाबा होणार आहेत. असं असलं तरी आजही विराट ते दिवस विसरलेला नाही जेव्हा तो अनुष्काला फोन करून लहान मुलांसारखा रडला होता. अनुष्का आणि विराट यांनी अनेक वर्ष एकमेकांना डेट केल्यानंतर ११ डिसेंबर २०१७ ला इटलीमध्ये डेस्टिनेशन वेडिंग केलं होतं. विराट आणि अनुष्का एकमेकांच्या कामात प्रोत्साहन तर देत असतातच शिवाय एकमेकांचे आधारस्तंभ म्हणून कायम उभे असतात. दोघांची पहिली भेट २०१३ मध्ये एका शॅम्पूच्या जाहिरातीदरम्यान झाली होती. विराट मैदानावर जेवढा आक्रमक असतो तेवढाच तो खऱ्या आयुष्यात फार संवेदनशील आहे. एका मुलाखतीत विराटने सांगितलं होतं की एकदा अनुष्काशी फोनवर बोलताना तो ढसाढसा रडला होता.'मला भारतीय क्रिकेट संघाचा कसोटी कर्णधार करण्यात आलं होतं. यासंदर्भात मला कॉल आला होता. मी भारतीय संघाचा कर्णधार झालो हे जेव्हा मला कळलं तेव्हा मी अनुष्काला फोन केला होता.' विराट पुढे म्हणाला की, 'त्यावेळी मला माझ्या करिअरचे सुरुवातीचे दिवस आठवले. क्रिकेट अकादमी ते भारतीय कसोटी संघाचा कर्णधार हा प्रवास मला आठवला. या सर्व गोष्टी माझ्यासोबत होईल याची मी कधी कल्पना केली नव्हती. या सर्व गोष्टी सांगताना मी रडू लागलो.' विशेष म्हणजे २०१७ मध्ये विराटला भारतीय संघाचा कसोटी कर्णधार करण्यात आलं होतं. आजही मैदानात अनुष्कासाठीचं प्रेम दाखवायला विराट विसरला नाही. जेव्हा नोव्हेंबर २०१४ मध्ये विराट कोहलीने श्रीलंकेविरूद्ध शतक ठोकल्यानंतर स्टेडिअममध्ये सामना पाहायला आलेल्या अनुष्काला किसचा इशारा केला होता तो व्हिडिओ सोशल मीडियावर तुफान व्हायरल झाला होता. अलीकडेच आणखी एक व्हिडिओ समोर आला, यात तो अनुष्काला जेवलीस का असा प्रश्न विचारताना दिसत आहे.
from Marathi Bollywood News, Marathi Cinema News https://ift.tt/32cSeJW
