कल्पेशराज कुबल करोनामुळे संपूर्ण जग काही काळ 'पॉज' झालं होतं. याच 'पॉज' जगाचा, मानवी भावभावनांचा, दोन अनोळखी व्यक्तींचा आणि भविष्याचा वेध घेणारा 'अनपॉज्ड' चित्रपट मनात घर करुन राहतो. कोव्हिड दरम्यान (वास्तविक) आणि कोव्हिड पश्चात काही वर्षांनी (काल्पनिक) नेमकं काय घडू शकतं याची गोष्ट लेखक दिग्दर्शकांच्या फळीने 'अनपॉज्ड'च्या निमित्तानं सांगितली आहे. करोनामुळे समाजातील विविध स्तरात घडलेल्या घटना या केवळ एका गोष्टीत समाविष्ट करणं कठीण आहे. त्यामुळे या सिनेमात पाच लघुपटांचा समावेश केला आहे. हा चित्रपट बघताना आपण अस्वस्थ होतो. कदाचित हेच या चित्रपटाचं यश समजावं लागेल. करोनाच्या आघातामुळे निर्माण झालेल्या सामाजिक परिणामांचे कंगोरे सदर सिनेमात दिसतात. करोनामुळे जनजीवन विस्कळीत झालं होतं. त्या दरम्यान नेमकं काय घडलं याची साक्ष 'द अपार्टमेंट', 'रॅट-अ-टॅट', 'विषाणू', 'चांद मुबारक' या चार कथा देतात. भविष्यात, कोव्हिड-३०च्या काळात मानवी संबंध कसे असतील याची झलक 'ग्लीच'मध्ये मिळते. त्यासह करोनाच्या दरम्यान अनोळखी व्यक्ती कशाप्रकारे एकमेकांच्या मदतीसाठी पुढे सरसावतात; हे देखील हा चित्रपट अधोरेखित करतो. दिग्दर्शक राज अँड डीके, निखिल अडवाणी, तनिष्ठा चॅटर्जी, अविनाथ अरुण, नित्या मेहरा या सहा दिग्दर्शकांनी चित्रपट आणले आहेत. पाच चित्रपटांपैकी दिग्दर्शक अविनाश अरुणचा 'विषाणू' हा अधिक भेदक आणि भावनिक भासतो. नायक, त्याची बायको आणि लहान मुलगा रोजगार मिळवण्यासाठी गावापासून दूर मुंबईत येतात. लॉकडाउनमुळे हातात काम नसतं. अशा परिस्थितीत गावी परत जाण्यासाठीची तळमळ, आर्थिक चणचण आणि भाडं न भरल्यानं मालकानं घराबाहेर काढलेल्या गरीब कुटुंबाची गोष्ट यात आहे. अविनाशने अत्यंत खुमासदार पद्धतीनं स्थलांतरीत कुटुंबाचं विश्व आणि त्यांचे प्रश्न मांडले आहेत. यात नायकाच्या भूमिकेतील अभिनेता अभिषेक बॅनर्जीच्या कामाचं कौतुक होतंय. दुसरीकडे दिग्दर्शक राज अँड डीके यांनी भविष्याचा वेध घेत 'ग्लीच' ही कथा मांडली आहे. यात अनेक संस्था कोव्हिड-३० विषाणूवरील लशीचं संशोधन करताहेत. यात समाज दोन गटात विभागला गेल्याचं दाखवण्यात आलं आहे. एका गटात योद्धे आहेत, ते संशोधनाच्या कामासाठी घराबाहेर पडत आहेत. दुसऱ्या गटात विषाणूच्या संसर्गाने घाबरलेले आहेत. यात अभिनेत्री सयामी खेर आणि गुलशन देवैन यांनी उत्कृष्ट अभिनय केला आहे. या गोष्टीतील गंमत पाहताना भुवया उंचावल्याशिवाय राहणार नाहीत. कुटुंबाचा आर्थिक स्तर कोणताही असो...प्रत्येकाचे आपापले असे प्रश्न आणि अडचणी असतात. एका उद्योजिकेच्या जीवनातील व्यावसायिक आणि कौटुंबिक चढ-उतारांची बाजू 'द अपार्टमेंट'मध्ये दाखवण्यात आली आहे. कठीण परिस्थितीशी दोन हात करण्यापेक्षा हार मानून आत्महत्या करण्याचं टोकाचं पाऊल उचलणाऱ्या 'ती'ची गोष्ट आहे. यातील 'ती'ची भूमिका अभिनेत्री रिचा चड्ढाने कुशलतेनं निभावली आहे. उर्वरित 'रॅट-अ-टॅट' आणि 'चांद मुबारक' यामध्ये दोन अनोळखी व्यक्तींनी एकमेकांना समजून घेण्याची समजूतदार गोष्ट अनुक्रमे तनिष्ठा चॅटर्जी आणि नित्या मेहरा या दिग्दर्शकांनी मांडली आहे. अनेकदा आपण क्षणार्धातच समोरच्या व्यक्तीला 'जज' करतो. याच 'जजमेंटल' होण्याच्या पलीकडे असलेला समजूतदारपणा दोन कथांमध्ये दिसतो. उपरोक्त दोन्ही कथांचे दिग्दर्शक काहीसे डगमगले असले तरीही त्यातील कलाकारांनी त्यांच्या अभिनयाच्या जोरावर सिनेमा उंचावला आहे. लिलेट दुबे, रिंकू राजगुरु, रत्ना पाठक शहा, शार्दुल भारद्वाज यांनी आपापल्या भूमिका सुरेख रेखाटल्या आहेत. एकंदरच चित्रपटात समाविष्ट असणारे पाचही लघुपट कलेच्या श्रेणीत आणि तांत्रिकदृष्ट्या अव्वल आहेत. त्यामुळे हा प्रत्येकाने पाहण्याजोगा चित्रपट झाला आहे. ०सिनेमा: अनपॉज्ड ०उपशीर्षक: ग्लीच निर्मिती: राज अँड डीके दिग्दर्शक: राज अँड डीके लेखन: राज अँड डीके कलाकार: गुलशन देवैन, सयामी खेर छायांकन: पंकज कुमार संकलन: सुमीत कोटीयन, धर्मेंद्र ककरला ० उपशीर्षक: द अपार्टमेंटनिर्मिती: मनीषा अडवाणी, मधु भोजवानी दिग्दर्शक: निखिल अडवाणी लेखन: संयुक्ता चावला शेख कलाकार: रिचा चड्ढा, सुमीत व्यास, ईश्वक सिंह छायांकन: कौशल शहा संकलन: सचिन कुणाल, सागर माणिक ० उपशीर्षक: रॅट-अ-टॅट निर्मिती: प्रितीश नंदी दिग्दर्शक: तनिष्ठा चॅटर्जी लेखन: देविका भगत, इशिता मोइत्रा कलाकार: लिलेट दुबे, रिंकू राजगुरु छायांकन: जॉन जॅकॉप पायापली संकलन: अंतरा लाहीरी ० उपशीर्षक: विषाणू निर्मिती: संजीवकुमार नायर, बैसाखी नायर दिग्दर्शक: अविनाश अरुण लेखन: शुभम कलाकार: अभिषेक बॅनर्जी, गीतिका विद्या छायांकन: नवगत प्रकाश संकलन: संयुक्ता काझा ० उपशीर्षक: चांद मुबारक निर्मिती: पिंक विंडो प्रॉडक्शन्स दिग्दर्शक: नित्या मेहरा लेखन: नित्या मेहरा, विदुर नौरीयल, तरुण दुधेजा कलाकार: रत्ना पाठक शहा, शार्दुल भारद्वाज छायांकन: जय ओझा संकलन: मानस मित्तल ० ओटीटी: अॅमेझॉन प्राइम व्हिडीओ ० दर्जा: तीन स्टार पाहा ट्रेलर:
from Marathi Bollywood News, Marathi Cinema News https://ift.tt/3nFXUFa
