संपदा जोशी ० तेरा वर्षांपासून '' ही मालिका करतेस, या प्रवासाबद्दल काय वाटतं ?- प्रवास अप्रतिम आहे. इतकी वर्षं मालिका पहिल्या क्रमांकावर राहणं, ही खासियत आहे. मालिकेत अनेक बदल झाले तरीही मालिकेची लोकप्रियता कायम आहे. प्रत्येक कलाकाराला त्याच्या कामामुळे ओळखलं जावं, प्रेक्षकांचं प्रेम मिळावं असं वाटत असतं आणि मला ते या मालिकेमुळे मिळालं. ० माधवी भिडे ही मराठी स्त्री प्रेक्षकांना भावली, याबद्दल काय सांगशील?- एक मध्यमवर्गीय स्त्री घर चालवण्यासाठी व्यवसाय करून तिच्या नवऱ्याला मदत करते, हे वास्तवदर्शी चित्र मालिकेत दाखवलं गेलंय. अशा स्त्रियांची मानसिकता कशी असेल हे माधवीमुळे समजतं. हिंदी लोकांमध्ये राहून मराठी स्त्री कसं बोलेल, हिंदीत बोलताना येणारे मराठी शब्द, तिचं वागणं या गोष्टी माझ्या भूमिकेतून दिसत असल्यामुळे प्रेक्षकांना माधवी भावते. ० तुझ्या साड्या, फॅशन स्टाइल स्त्रिया फॉलो करतात, याबद्दलचा तुझा अनुभव काय ?- साड्या, हेअरस्टाइल याविषयी मला प्रतिक्रिया येत असतात. पुरूषांनाही माझ्या साड्या आवडतात, याचं मला नवल वाटतं. माझी व्यक्तिरेखा प्रेक्षकांना इतकी आवडते की वेशभूषा स्पर्धेत सुद्धा ते लहान मुलींना माधवी सारखं तयार होऊन पाठवतात. एवढी वर्षं साडी, अंबाडा हे सांभाळून काम करताना कधीकधी कंटाळा येऊ शकतो पण मला असं वाटत नाही. कारण माझ्या पात्राची ओळख असण्यात या गोष्टींचा मोठा वाटा आहे. ० खऱ्या आयुष्यातही घरी पापड- लोणची तयार करतेस का कधी?- अजिबातच नाही. माझी आई हे सगळं पदार्थ खूप छान बनवते. त्यामुळे मला पापड-लोणची तिच्याकडूनच मिळतात. ० इतर माध्यमात काम करावंसं वाटत नाही का?- अगदी मनापासून वाटतं. रंगभूमीची प्रचंड आठवण येते. एखादी भूमिका प्रेक्षकांसमोर लाइव्ह साकारणं, मग त्यांच्या प्रतिक्रिया येणं या गोष्टी मला पुन्हा अनुभवायच्या आहेत. पण सध्या या मालिकेत व्यग्र असल्यामुळे इतर काहीही करू शकत नाही. अनेकांना मला वेगळ्या भूमिकेत बघायचंय. त्यासाठी ते संहिता लिहून तयारही आहेत. या मालिकेतलं काम संपलं की सर्वात आधी नाटक करणार आहे. त्यानंतर मराठी मालिका, चित्रपट आणि वेब सीरिजकडे वळेन. ० हल्ली मनोरंजनासाठी अनेक कार्यक्रम, चित्रपट येत असतात, यात तू तुझ्या भुमिकेचं वेगळंपण कसं जपतेस?- मनोरंजनविश्व खूप मोठं आहे. नवनवीन कलाकृती येत राहणारच. कथेनुसार तुम्ही तुमच्या पात्राला समजून घेतलं की काम करणं सोपं होतं. मी माझ्या व्यक्तिरेखेची इतर कोणाशीही तुलना करत नसल्यामुळे वेगळेपण शोधावं लागत नाही. ० सोशल मीडियावर फार नसतेस, असं का?- प्रत्येक विषयावर तुम्ही भाष्य करू शकत नाही. संपूर्ण माहिती नसताना उगाचच मत व्यक्त करणं, मला पटत नाही. वैयक्तिक आयुष्य सतत चाहत्यांसमोर उघडायलाही मला आवडत नाही. एखादं पुस्तक, चांगल्या ओळी, शायरी किंवा एखादा पदार्थ तयार केला असेल तर त्याचा फोटो अशा काही निवडक गोष्टी मी शेअर करते.
from Marathi Bollywood News, Marathi Cinema News https://ift.tt/3qFDkpw
