मुंबई- बॉलिवूडचे शहेनशाह अमिताभ बच्चन यांची नात नव्या नवेली सोशल मीडियावर नेहमी सक्रिय असते. नव्या चित्रपटसृष्टीपासून दूर राहणं पसतं करते. तिचं स्वप्न आपल्या आजोबांसारखं अभिनय क्षेत्रात नाव कमावण्याचं नसून, तिला वडिलांचा व्यवसाय सांभाळण्यात अधिक रस असल्याचं नव्याने एका मुलाखतीत सांगितलं. यावर एका यूजरने नव्याची आई श्वेता बच्चनला ट्रोल करण्याचा प्रयत्न केला होता. त्यावर, नव्याने हटके उत्तर दिलं आहे. एका मुलाखतीत नव्याने सांगितल्याप्रमाणे, ती तिच्या चौथ्या पिढीतील पहिली मुलगी आहे, जी त्यांच्या व्यवसायाची जबाबदारी स्वतःच्या खांद्यावर घेणार आहे. नव्या म्हणाली की, 'मी माझ्या घरात काम करणाऱ्या स्त्रियांमध्ये वाढली आहे. माझी आई, आजी, आत्यादेखील व्यवसाय करायच्या. मी त्यांच्याकडून हे बाळकडू घेतलं आहे.' तिच्या या वक्तव्यावर एका यूजरने कमेन्ट करत तिला विचारलं, 'नव्या तुझी आई काय काम करते?' त्यावर तिने शांततेत उत्तर दिलं, 'ती एक लेखिका, डिझायनर, पत्नी आणि एक आई आहे.' यूजरच्या प्रश्नाचा स्क्रीनशॉट काढून नव्याने त्यावर लिहिलं, 'आई आणि पत्नी असणं हेसुद्धा पूर्णवेळ काम करण्यासारखं आहे. असे प्रश्न विचारून त्या महिलांचा अपमान करू नका, ज्या दिवसभर घरी राहून आपल्या कुटुंबासाठी झटत असतात. पुढच्या पिढीला वाढवण्यासाठी त्यांचं योगदान अत्यंत महत्वाचं असतं.' नव्याच्या या उत्तराचं अनेक चाहत्यांनी कौतुक केलं आहे. याआधीही नव्याने अशा ट्रोलर्सला सडेतोड उत्तर दिलं होतं, जे तिच्या नवेली या प्रकल्पावर शंका उपस्थित करत होते. नवेली या प्रकल्पाचा उद्देश महिलांचं सशक्तीकरण व सबलीकरण करणं आहे.
from Marathi Bollywood News, Marathi Cinema News https://ift.tt/3dkmxow
