मुंबई- शेतकरी आंदोलनाचा वाद दिवसेंदिवस अधिकच चिघळत चालला आहे. पॉप स्टार रिहानाने शेतकरी आंदोलनाला दिलेल्या जाहीर पाठिंब्यानंतर संपूर्ण जगातून त्यावर प्रतिक्रिया येण्यास सुरुवात झाली. तसेच हिंदी सिनेसृष्टीतील कलाकारांनीही आपल्या भूमिका स्पष्ट केल्या. रिहानाच्या ट्विटला प्रतिउत्तर देत कंगना रणौतने तिला चांगलंच धारेवर धरलं होतं. तिने आपल्या ट्विटमध्ये दिल्लीच्या सीमेवर आंदोलन करणारे शेतकरी नसून दहशतवादी आहेत, असं म्हटलं होतं. सोशल मीडियावर वारंवार कंगना आंदोलनकर्त्या शेतकऱ्यांना दहशतवादी म्हणत असल्याने पंजाबी अभिनेत्री तिच्यावर प्रचंड भडकली. हिमांशीने कंगनाला ट्विटरवर तिच्याच भाषेत उत्तर दिलं. हिमांशीने ट्वीट करत लिहिलं की, 'हे जे प्रत्येकवेळी शेतकऱ्यांना दहशतवादी म्हणत आहेत, त्याचे पडसाद कुठपर्यंत उमटतील याची जाणीव तुला आहे का? संपूर्ण जग आपल्याकडे वेगळ्या नजरेने बघेल. आपल्या नवीन पिढीला कोणत्या अडचणींना सामोरं जावं लागेल, याचा विचार का नाही करत? स्वतःच्या फायद्यासाठी एका मोठ्या समुदायावर प्रश्नचिन्ह उभं करताय? का?' पुढे तिने लिहिलं, 'भारत आमचाही देश आहे आणि आम्ही आमच्या देशासोबत आहोत. देशाचे तुकडे करायला तुम्ही सुरुवात केली. देशातील एका राज्याला जर एखादी गोष्ट मान्य नाही तर, आम्ही त्याबद्दल बोलू नये का?' हिमांशीने तिच्या ट्विटरवर आणखी एक पोस्ट टाकली, ज्यात ती कंगनाला प्रश्न विचारतेय. तिने लिहिलं, 'मी मान्य करते की बाहेरच्या लोकांनी आमच्या देशातल्या घडामोडींबद्दल बोलू नये. पण, जेव्हा आपलेच लोकप्रिय अभिनेते शेतकऱ्यांना दहशतवादी ठरवून देशाचे तुकडे करण्याबाबत बोलत आहेत तेव्हा कोणी काहीच का बोलत नाही? आम्हाला दहशतवादी बोलून हे भारताच्या सुरक्षेबाबत प्रश्नचिन्ह उभं करत आहेत. एवढे दहशतवादी भारतात कुठून आले... वाह लॉजिक तर बघा. भारताला एकत्र करण्याआधी प्रत्येक समुदायाचा आदर करायला शिका.' हिमांशीचा शेतकरी आंदोलनाला सुरुवातीपासूनच पाठिंबा आहे. या आधीही कंगनाला तिने असेचं खडे बोल सुनावले होते.
from Marathi Bollywood News, Marathi Cinema News https://ift.tt/2MDS4H9
