मुंबई: देशात पुन्हा एकदा करोना व्हायरसच्या रुग्णांची संख्या वाढताना दिसत आहे. त्यातही चित्रपटसृष्टीत काम करणाऱ्या लोकांना मोठ्या प्रमाणावर करोनाचं संक्रमण झाल्याचं दिसून येत आहे. अनेक बॉलिवूड कलाकार करोना पॉझिटिव्ह असतानाच आता दाक्षिणात्य अभिनेता महेश बाबूच्या एका कर्मचाऱ्यालाही करोना व्हायरसची लागण झाल्याची माहिती मिळते. त्याच्या ड्रायव्हरची करोना टेस्ट पॉझिटिव्ह आली आहे. त्यामुळे सध्या महेशबाबूच्या घरात चिंतेचं वातावरण आहे. स्पॉटबॉयनं दिलेल्या वृत्तानुसार महेश बाबूच्या ड्रायव्हरला करोना झाला आहे. हे समजल्यानंतर महेश बाबूची पत्नी अभिनेत्री नम्रता शिरोडकरनं महत्त्वाचा निर्णय घेतला. नम्रतानं घरातील सर्व सदस्यांची करोना टेस्ट करून घेतली. सुदैवानं घरातील इतर कोणत्याही सदस्याची टेस्ट पॉझिटिव्ह आली नाही. दरम्यान महेश बाबूने आपल्या दोन्ही मुलांना बाहेर कुठेही जाण्यास बंदी घातली आहे. मागच्या वर्षी करोनाच्या संक्रमणात महेश बाबूनं आपला संपूर्ण वेळ कुटुंबाला दिला होता. पण जसं करोनाचं संक्रमण कमी झालं तसं त्यानं करोनाच्या नियमांचं काटेकोरपणे पालन करत चित्रपटांच्या शूटिंगला सुरुवात केली होती. करोनाच्या काळात महेश बाबून सोशल मीडियावर एक पोस्ट शेअर केली होती. ज्यात त्यानं लिहिलं, 'आपल्या सर्वांसाठी हा काळ कठीण आहे. त्यामुळे आपल्या कुटुंबाला आपण पहिलं प्राधान्य दिलं पाहिजे. बाकी सर्व गोष्टी तुमची वाट पाहू शकतात.' महेश बाबूच्या वर्कफ्रंट बद्दल बोलायचं तर लवकरच तो 'सरकारु वारी पाटा' या चित्रपटातून प्रेक्षकांच्या भेटीला येणार आहे. या चित्रपटाच्या पहिल्या शेड्युलचं शूटिंग नुकतंच संपलं आहे. याशिवाय तो अभिनेत्री जान्हवी कपूरसोबत 'पॅन इंडिया' या चित्रपटातही दिसणार आहे. जान्हवी या चित्रपटातून दाक्षिणात्य चित्रपट सृष्टीत पादर्पण करत आहे.
from Marathi Bollywood News, Marathi Cinema News https://ift.tt/2PbbnZC