मुंबई: टीव्ही अभिनेत्री ते बॉलिवूड असा यशस्वी प्रवास करणारी अभिनेत्री प्राची देसाईनं प्रेक्षकांच्या मनात स्वतःचं वेगळं स्थान निर्माण केलं आहे. २००६ मध्ये 'कसम' या मालिकेतून टीव्ही पदार्पण करणाऱ्या प्राची देसाईनं २००८ मध्ये फरहान अख्तरच्या रॉक ऑन चित्रपटातून बॉलिवूडमध्ये पाऊल टाकलं. त्यानंतर तिनं बऱ्याच बॉलिवूड चित्रपटांमध्ये काम केलं पण २०१५ नंतर ती बॉलिवूड चित्रपटांमध्ये फराशी दिसेना झाली. मागच्या काही काळापासून सोशल मीडियावर चर्चेत राहणाऱ्या प्राची देसाईनं नुकत्याच दिलेल्या एका मुलाखतीमध्ये बॉलिवूडमध्ये होणाऱ्या कास्टिंग काऊचवर भाष्य केलं आहे. नुकत्याच दिलेल्या एका मुलाखतीत प्राची देसाईनं स्वतःच्या कास्टिंग काऊचच्या अनुभवाबद्दल सांगितलं आहे. याशिवाय एका दिग्दर्शकानं बिग बजेच चित्रपटासाठी तिला तडजोड करण्यास सांगितल्याचाही खुलासा तिनं यावेळी केला. प्राची म्हणाली, 'मला एका बिग बजेट चित्रपटाची ऑफर मिळाली होती. पण त्यासाठी मला तडजोड करण्यासाठी सांगण्यात आलं होतं. पण जेव्हा मी याला नकार दिला तेव्हा दिग्दर्शकानं पुन्हा संपर्क करून मला असं करण्याविषयी सुचवलं पण मी स्पष्टपणे याला नकार दिला आणि हा चित्रपट सोडण्याचा निर्णय घेतला.' म्हणते, 'बॉलिवूडमध्ये मोठया प्रमाणावर भ्रष्टाचार आणि घराणेशाही आहे. पण आता ओटीटी सारख्या प्लॅटफॉर्ममुळे मी खूप खूश आहे कारण या ठीकाणी तुम्हाला बरेच पर्याय उपलब्ध आहेत आणि या ठिकाणी विविध प्रकारचा कन्टेंट आपल्याला पाहायला मिळतो. आगामी काळात माझ्याकडे काही चांगले प्रोजेक्ट आहेत. ज्यासाठी मी खूप उत्सुक आहे.' प्राचीच्या वर्कफ्रंट बद्दल बोलायचं तर काही दिवसांपूर्वीच ती मनोज बाजपेयीसोबत वेब सीरिज 'सायलेन्स'मध्ये दिसली होती. दरम्यान एका मुलाखतीत तिला तिच्या भविष्यातील प्लानबद्दल विचारण्यात आलं त्यावेळी ती म्हणाली, 'एका दिग्दर्शकाचं काम खूप जबाबदारीचं असतं. पण तो जे करतो ते खूपच उत्तम असतं. हे काम अर्थातच खूप कठीण आहे. पण मला वाटतं मी ते करायला हवं. मी भविष्यात दिग्दर्शन करेन.' प्राचीनं 'वन्स अपॉन ए टाइम इन मुंबई', 'बोल बच्चन', 'अजहर', 'लाइफ पार्टनर' आणि 'पुलिसगिरी' यांसारख्या चित्रपटांमध्ये काम केलं आहे.
from Marathi Bollywood News, Marathi Cinema News https://ift.tt/3n1e1NT
