मुंबई- हे नाव आता फक्त दाक्षिणात्य सिनेसृष्टीपर्यंतच मर्यादित राहिलं आहे असं नाही. तर संपूर्ण भारतात तिचे असंख्य चाहते आहेत. नॅशनल क्रश ही विशेष उपाधीही तिला चाहत्यांनी दिली आहे. रश्मिकाला ओझरतं का होईना पाहता यावं यासाठी तिचे कट्टर चाहते वाट्टेल ते करण्याच्या तयारीत असतात. असाच एक किस्सा नुकता घडला जेव्हा एक माथेफिरू चाहता चक्क ९०० किमीचा प्रवास करून कर्नाटकमधील रश्मिकाच्या घरी पोहोचला. रश्मिकाला एकदा भेटता यावं यासाठी त्या चाहत्याने तब्बल ९०० किमीचा प्रवास केला होता. पण रश्मिका तेव्हा घरी नव्हती. सध्या ती मुंबईत तिच्या आगामी हिंदी सिनेमाच्या चित्रीकरणासाठी आली आहे. रश्मिका सध्या गुडबाय या तिच्या आगामी हिंदी सिनेमाच्या चित्रीकरणात व्यग्र आहे. विकास बहल दिग्दर्शित या सिनेमात अमिताभ बच्चन यांची मुख्य भूमिका आहे. ही घटना जेव्हा रश्मिकाला कळली तेव्हा अभिनेत्रीने त्वरित ट्वीट करून आपल्या चाहत्यांना असे काहीही न करण्याची विनंती केली. तसेच फक्त सोशल मीडियावरून प्रेम व्यक्त करत रहा असा संदेशही दिला. इतकेच नाही तर रश्मिकाने असेही म्हटले की त्या चाहत्याला भविष्यात ती नक्की भेटेल अशीही तिला आशा आहे. रश्मिकाने लिहिले- 'मित्रांनो, मला नुकतेच कळले की तुमच्यातील एक चाहता मला भेटण्यासाठी फार दूरचा प्रवास करून आला. कृपया असं काही करू नका. मला वाईट वाटले की मी त्याला भेटू शकत नाही. आशा आहे की एक दिवस मी मी तुम्हाला नक्कीच भेटेन.' मीडिया रिपोर्टनुसार, रश्मिकाचा हा चाहता तेलंगणाहून कर्नाटकातील कोडागु येथील अभिनेत्र्या घरी गेला होता. गूगलमधून त्याने रश्मिकाच्या घराचा पत्ता शोधला आणि कोडागुमध्ये पोहोचल्यावर स्थानिक लोकांना विचारले. यानंतर तेथे राहणाऱ्या लोकांनी तातडीने पोलिसांना कळविले आणि त्याला घरी परत पाठविण्यात आले. सर्वात सुंदर आणि लोकप्रिय अभिनेत्रींपैकी एक रश्मिका मंदानाला गेल्यावर्षी २०२० मध्ये गुगलने राष्ट्रीय क्रश ऑफ इंडिया घोषित केले होते. गूगलमधील नॅशनल क्रशच्या सर्चमध्ये रश्मिकाचे नाव समोर आले होते. ५ एप्रिल, १९९६ रोजी कर्नाटकच्या विराजपेत जन्मलेल्या रश्मिकाचे स्टायलिश कपडेच चर्चेत असतात असं नाही तर तिचा गोंडस चेहरा, सौंदर्य आणि तिची अनोखी स्टाइलही चाहत्यांमध्ये प्रचंड प्रसिद्ध आहे. दरम्यान, रश्मिका आता दाक्षिणात्य सिनेसृष्टीतील सर्वाधिक मानधन घेणाऱ्या अभिनेत्रींच्या यादीत सहभागी झाली आहे. रश्मिकाने २०१६ पासून अभिनय करण्यास सुरुवात केली होती. अवघ्या चार वर्षात ती आता दाक्षिणात्य सिनेसृष्टीतील बड्या अभिनेत्रींना टक्कर देत आहे. मानधनाच्या बाबतीत रश्मिका आता नयनतारा, अनुष्का शेट्टी आणि नागार्जुन यांची सून समांथा अक्कीनेनी यांना टक्कर देत आहे.
from Marathi Bollywood News, Marathi Cinema News https://ift.tt/3x6GqXe
