मुंबई- लोकप्रिय बॉलिवूड अभिनेत्री आजही प्रेक्षकांच्या मनावर राज्य करतात. रेखा यांचं आरस्पानी सौंदर्य पाहून कित्येक चाहते घायाळ होतात. कधी बोल्ड तर कधी पारंपरिक वेश करून रेखा यांनी चाहत्यांचं मन जिंकलं. आजही त्यांच्या सौंदर्याच्या चर्चा संपूर्ण बॉलिवूडमध्ये आहेत. समोरच्याला नुसत्या नजरेने भुरळ घालणाऱ्या रेखा सध्या मोठ्या पडद्यापासून दूर आहेत. परंतु, बॉलिवूड पार्टी किंवा पुरस्कार सोहळ्याला रेखा आवर्जून हजेरी लावतात. कधीकाळी यशाच्या शिखरावर असणाऱ्या रेखा यांनी मुळात अभिनेत्री व्हायचा विचारदेखील केला नव्हता. त्यांना तर सर्वसामान्य स्त्रियांप्रमाणे लग्न करून संसार थाटायचा होता. वयाच्या १३ व्या वर्षापासून अभिनय क्षेत्रात पाऊल ठेवणाऱ्या रेखा यांनी एका मुलाखतीत या गोष्टीचा खुलासा केला होता. त्यांच्या स्वप्नांबद्दल सांगताना रेखा म्हणाल्या होत्या की, त्यांना कधीही अभिनेत्री व्हायची इच्छा नव्हती. तर परिस्थितीमुळे त्यांना या क्षेत्रात यावं लागलं. रेखा यांना अशा व्यक्तीसोबत लग्न करायचं होतं ज्याला त्यांची काळजी असेल, जो रेखा यांचा मान ठेवेल. रेखा यांना सर्वसामान्य गृहिणीप्रमाणे घर सांभाळायचं होतं. रेखा यांना खूप मुलं हवी होती. त्यांना मुलांसोबत खेळायचं होतं. पण ते सगळं स्वप्नच राहिलं. याच मुलाखतीत त्यांनी आणखी एक खुलासा केला होता. रेखा यांनी त्यांच्या मित्रपरिवाराबद्दल सांगताना म्हटलं होतं की, त्यांच्या शाळेतील मित्रमैत्रिणींना वाटायचं की रेखा कधीही चांगल्या अभिनेत्री होऊ शकणार नाहीत. परंतु, जेव्हा रेखा यांचा 'सावन भादो' चित्रपट हिट झाला तेव्हा रेखा यांना लोकप्रियता मिळू लागली. रेखा यांच्या मित्रमैत्रिणींना त्यांची लोकप्रियता सहन झाली नाही. रेखा यांना मिळणाऱ्या प्रसिद्धीमुळे त्यांच्या मित्रमैत्रिणी त्यांच्यापासून दुरावल्या. रेखा यांनी मोठ्या पडद्यावर यश मिळवलं मात्र त्यांचं वैयक्तिक आयुष्य मात्र नेहमीच खाचखळग्यांनी भरलेलं राहिलं. रेखा गेल्या काही वर्षात 'कोई मिल गया', 'क्रिश', 'सुपर नानी' यांसारख्या चित्रपटात झळकल्या आहेत.
from Marathi Bollywood News, Marathi Cinema News https://ift.tt/2XjB65R
