मुंबई : अभिनेत्री आणि प्रसिद्ध यूट्यूबर उर्मिला निंबाळकरला काही दिवसांपूर्वी मुलगा झाला. बाळाच्या जन्मानंतर काही दिवसांनी उर्मिलाने त्याचे फोटो आपल्या सोशल मीडियावर शेअर केले होते. चाहत्यांनी तिच्यावर आणि तिच्या बाळावर शुभेच्छांचा वर्षाव केला होता. उर्मिलाने तिच्या बाळाचे फोटो शेअर केल्यानंतर त्याचे नाव काय ठेवणार याची सर्वांना उत्सुकता होती. उर्मिलाच्या बाळाचे नुकतेच बारसे झाले. बारशाचा व्हिडिओ उर्मिलाने तिच्या यूट्यूब चॅनेलवर शेअर केला आहे. या व्हिडिओवर तिचे चाहते भरभरून कमेन्ट करत आहेत. उर्मिलाच्या लेकाच्या बारशाचा सोहळा अतिशय देखण्या पद्धतीने आयोजित करण्यात आला होता. या सोहळ्याला नातेवाईक, मित्र- परिवाराला आमंत्रित केले होते. यामध्ये उर्मिलाचा भाऊ आयपीएस अधिकारी वैभव निंबाळकर हेदेखील उपस्थित होते. उर्मिलाने तिच्या लेकाच्या बारशासाठी निळ्या रंगाची थीम ठेवली होती. त्यामुळे या कार्यक्रमाला आलेल्या सर्व पाहुण्यांनी निळ्या रंगाचे कपडे परिधान केले होते. तसेच कार्यक्रमाच्या ठिकाणी देखील निळ्या रंगाचेच डेकोरेशन केले होते. उर्मिलाने तिच्या बाळाचे नाव 'अथांग' असे ठेवले आहे. अथांग म्हणजे व्यापक. समुद्राला, आकाशाला हे विशेषण दिले जाते. आकाश, समुद्राप्रमाणे आपल्या मुलाचे मन, त्याचे विचार ही व्यापक असू देत... कसलीही जात, धर्म, भाषा, पंथ, नकारात्मकतेची कुठलीच कुंपणे त्याच्या मनाला नकोत या अनुषंगानेच उर्मिला आणि तिच्या नवऱ्याने सुकीर्तने आपल्या बाळाचे नाव अथांग ठेवले आहे. उर्मिला निंबाळकरने काही दिवसांपूर्वी आपल्या डोहाळे जेवणाचा व्हिडीओ तिच्या यूट्यूब चॅनलवर अपलोड केला होता. पुण्यातील प्रसिद्ध ढेपे वाड्यात तिचे डोहाळ जेवणाचा कार्यक्रम झाला होता. दरम्यान, उर्मिला निंबाळकरने दिया और बाती हम, मेरी आशिकी तुम से ही, एक तारा, दुहेरी अशा मालिकातून अभिनय केला आहे.
from Marathi Bollywood News, Marathi Cinema News https://ift.tt/3qubNdQ
