मुंबई : करोनाच्या प्रादुर्भावामुळे राज्यातील सर्व नाट्यगृहे, सिनेमागृह बंद झाली होती. त्यामुळे मनोरंजन विश्वावर संकट कोसळले होते. गेल्या दोन वर्षांपासून सिनेमागृह, नाट्यगृह बंद असल्यामुळे सर्वांचे खूपच नुकसान झाले. परंतु आता करोनाचा प्रादुर्भाव कमी झाल्याने राज्य सरकारने सर्व निर्बंध मागे घेतले आहेत. त्यात सिनेमागृह आणि नाट्यगृह पन्नास टक्के क्षमतेने सुरू करण्यास परवानगी दिली. सरकारने घेतलेल्या या निर्णयामुळे मनोरंजन विश्वामध्ये चैतन्याचे वातावरण पसरले. अनेक मोठ्या सिनेमांचा थिएटरपर्यंतचा मार्ग मोकळा झाला. या सर्व पार्श्वभूमीवर प्रसिद्ध सिनेदिग्दर्शक समीर विद्धांस यांनी सोशल मीडियावर पोस्ट करत मराठी प्रेक्षकांना आणि महाराष्ट्र राज्य सरकारला हात जोडून विनंती केली आहे. काय म्हणाले समीर विद्धांस राज्यात करोनाचा प्रादुर्भाव कमी झाल्यानंतर सिनेमागृह आणि नाट्यगृहे ५० टक्के क्षमतेने सुरू करण्याचा निर्णय राज्य सरकारने जाहीर केला. यामुळे संपूर्ण मनोरंजन विश्वाला मोठा दिलासा मिळाला. सिनेमागृह, नाट्यगृह सुरू झाल्याच्या पार्श्वभूमीवर समीर यांनी सोशल मीडियाद्वारे मराठी प्रेक्षकांना आणि राज्य सरकारला हात जोडून एक कळकळीची विनंती केली. ही पोस्ट शेअर करताना त्यांनी लिहिले आहे की, 'हे मनापासून बोलावसं वाटलं म्हणून... सगळ्यांच्यावतीने... सगळ्यांसाठी...' समीर यांनी मराठी प्रेक्षकांना विनंती केली की, 'गेलं दीड वर्ष सगळ्यांसाठीच आर्थिक गणित कोलमडून टाकणारं गेलं, अजूनही जातंय. मनोरंजन क्षेत्रही यातून सुटलेलं नाही. लाखो कुटुंब पोळली गेली, काही अजूनही झगडताएत. कोट्यवधींची गुंतवणूक दोन वर्ष अडकून आहे. त्यावर अनेकांचे भवितव्य अवलंबून आहे आणि आता कुठे गाडी यार्डातून बाहेर येत आहे. पण ती नीट रुळावर आणणं पूर्णपणे आता प्रेक्षकांच्या हातात आहे. हिंदीचे १५० कोटी पार आकडे बघताना मनापासून वाटते की असाच भरघोस हाऊसफुल्ल प्रतिसाद मराठी चित्रपटांनाही मिळावा! ते चित्र बघायला आणि अनुभव घ्यायला आम्ही सर्व कलाकार मंडळी आसुसलोय!' 'खरंच सांगतो आम्हा सगळ्या कलाकरांच्या वतीने हात जोडून विनंती करतो की येणारे मराठी चित्रपट शक्य तितके चित्रपटगृहात जाऊनच बघा. नाही आवडले तर तसे मोकळेपणाने सांगाच, तो तुमचा हक्कच आहे. पण तुम्ही जर भरभरून प्रतिसाद दिलात तर आणि तरच आपली मराठी चित्रपटसृष्टी परत एकदा हळूहळू रांगायला, चालायला आणि मग धावायला लागेल. याचबरोबर राज्य सरकारलाही विनंती आहे. बाकी सगळे अगदी नीट व्यवस्थित सुरू झाले आहे. तर मग चित्रपट आणि नाट्यगृह पूर्ण क्षमतेने लवकरात लवकर सुरू करण्यात यावीत.’ असे समीरने ट्वीटमध्ये म्हटले आहे. समीर यांनी केलेले हे ट्वीट सोशल मीडियावर खूपच चर्चेत आले आहेत. त्यावर युझर्सही भरभरून प्रतिक्रिया देत आहेत. दरम्यान, वैशिष्ट्यपूर्ण विषयांवर सिनेदिग्दर्शित करून समीर यांनी स्वतःचं असं वेगळं स्थान निर्माण केलं आहे. त्यांचे डबल सीट, टाइम प्लीज, आनंदी गोपाळ यांसारखे सिनेमे विशेष गाजले. मराठीमध्ये आपल्या नावाचं नाणं खणखणीत वाजवल्यानंतर समीर यांनी आपला मोर्चा आजा बॉलिवूडकडे वळवला आहे. कार्तिक आर्यन स्टारर सत्यनारायण की कथा हा त्यांचा पहिला हिंदी सिनेमा असणार आहे. सध्या या प्रोजेक्टच्या प्री- प्रोडक्शनचं काम सुरू आहे.
from Marathi Bollywood News, Marathi Cinema News https://ift.tt/3HxrE1v
