अभिषेक खुळेAbhishek.Khule@timesgroup.com पूर्ण वाचून झाल्यावर एखादं पुस्तक मिटावं. पापण्यांची दारं बंद करून शांतपणे पडावं. पुस्तकातले ते प्रसंग, ती पात्र आपल्या मन:पटलावर सतत रेंगाळत राहावीत. एखाद्या साहित्याचं, कलाकृतीचं हे यशच. अगदी अशीच अनुभूती घ्यायची असेल, तर ‘’ हे उदाहरण पुरेसं आहे. हा चित्रपट पाहिल्यानंतर तो डोक्यातून सहजासहजी निघत नाही, विचार करायला लावतो. तिथंच लेखक, दिग्दर्शक, कलावंत अन् अख्खी टीम यशस्वी झालेली असते. केवळ व्यावसायिक चित्रपटांचे दर्दी असलेल्या रसिकांनीही ‘सर’ एकदा पाहावा. भारतीय चित्रपट आशयाच्या बाबतीत सरस आहेच. मात्र, काही कुंपणे बाजूला सारत तो कसा प्रगती करतोय, हेही यातून अधोरेखित व्हावं. २०१८ साली कान्स महोत्सवात ‘सर’ प्रदर्शित झाला होता. पण व्यावसायिक चित्रपटांच्या भाऊगर्दीत त्याची फारशी चर्चा झालेली नव्हती. आता तो नेटफ्लिक्सवर येताच चित्रपटांच्या जाणकारांपासून ते सामान्य प्रेक्षकांपर्यंत सर्वांनीच ‘सर’ची भरभरून स्तुती केली. असं काय आहे ‘सर’मध्ये? तर अव्यक्त भावनांची हृदयापर्यंत पोहोचणारी कंपनं यात जाणवतात. अमेरिकेत वाढलेला, शिकलेला व आता मुंबईत स्थिरावू पाहणारा आर्किटेक्ट अश्वीन () आणि त्याच्याकडे काम करणारी मोलकरीण रत्ना () या दोघांतील ही हळवी कथा. अश्वीनचं लग्न तुटलंय. तो नैराश्याच्या गर्तेत जातोय. रत्ना त्याच्या घरात आपलं काम चोख बजावते आहे. दोघेही एकाच घरात राहूनही त्यांच्यातील ‘अंतर’ दिग्दर्शिका रोहेना गेरा यांनी उत्तम रेखाटलं आहे. अश्वीनला सिरॅमिक कपात चहा देणारी रत्ना स्वयंपाकघरात ओट्याजवळ तोच चहा स्टीलच्या ग्लासात घेते. अश्वीन त्याच्या खोलीत न्यूज चॅनल्स पाहतोय तर रत्ना आपल्या सर्व्हंट रूममध्ये मराठी मालिका पाहतेय. अश्वीन शाही डायनिंग टेबलवर जेवतोय, तर रत्ना स्वयंपाकघरात कोपऱ्यात खाली साधं जेवण जेवताना दिसते. कथा सुरू असताना जाणवतं, दोघांच्याही मनात... किंबहुना अश्वीनच्या अधिक, एकमेकांविषयी काहीतरी आहे. मात्र, ते अव्यक्त आहे. रत्नाला आपल्या मर्यादांची पूर्ण जाणीव आहे. म्हणूनच, एका घरात असून कुठल्याही मर्यादा पार होत नाहीत. जी असते, ती आदराची जवळीक. लहान वयातच वैधव्य आलेली रत्ना एका छोट्याशा वाक्यात अश्वीनमध्ये हिंमत पेरते. तीनच दिवसांसाठी ती तिच्या बहिणीच्या लग्नाला जाते, त्यावेळी अश्वीनची अस्वस्थता, सहज फोन करून त्यानं ‘रत्ना’ म्हणून मनातून मारलेली हाक... नंतर त्यानं प्रेमाची कबुली देताच दोघांमधील सामाजिक दरीची रत्नानं करून दिलेली जाणीव; सर्व काही आपल्या मनावर उमटत जातं. पाहा ट्रेलर: उत्तम लेखिका असणाऱ्या रोहेना यांनी आपल्या कथेला दिग्दर्शनाच्या माध्यमातून उत्तम न्याय दिलाय. संवादांत सहजता आहे. अश्वीन विचारतो, ‘भगवान पे विश्वास करती हो?’ तेव्हा ‘करना पडता हैं...’ हे रत्नानं दिलेलं उत्तर कमालीचं बोलकं. डॉमिनिक कॉलिनची सिनेमॅटोग्राफी, जॅक्स कॉमेट्स, बाप्टिस्ट रिब्रॉल्ट यांचे संकलन उत्तम. संगीतही परिणाम साधतं. याआधी ‘कोर्ट’मध्ये आपल्यातील कलागुणांची चुणूक दाखवणारा विवेक गोम्बर आणि आपल्यातील सहजतेनं नावाजली गेलेली तिलोतमा यांच्या अभिनयाविषयी काय बोलावं ! तिलोतमा मोलकरीण म्हणून कमालीची सहज वावरलीय. ‘नमस्ते सर’, ‘खाना लगा दू सर?’ अशा काळजीच्या शब्दांतून रत्ना आपलीशी वाटत राहते. गीतांजली कुलकर्णी यांनी रत्नाला साथ देणारी, तिच्याकडे मन मोकळं करणारी लक्ष्मी चांगली रंगवलीय. या दोघांमधील हे निर्व्याज प्रेम पुढं कुठल्या वळणावर जातं, हे प्रत्यक्ष पाहण्यात मजा आहे. शेवट ‘मास्टरस्ट्रोक’ आहे. कथानक स्लो चालतंय, असं वाटू शकतं. मात्र, जीवन तरी कुठं एवढं फास्ट चालतं? खरंतर हे कथानक आपलं बोट धरून सोबत नेत राहतं, जीवनाचा वेगळा पैलू दाखविण्यासाठी. शेवटी जाणकार रसिकाला उमगतं... आफ्टरऑल कंटेंट इज द किंग! सर निर्माते : रोहेना गेरा, ब्राइस पॉइसन दिग्दर्शन-पटकथा : रोहेना गेरा कलाकार : विवेक गोम्बर, तिलोतमा शोम, गीतांजली कुलकर्णी, दिव्या सेठ, दिलनाझ इराणी, अनुप्रिया गोएंका आदी संगीत : राघव वागव ओटीटी : नेटफ्लिक्स दर्जा : चार स्टार
from Marathi Bollywood News, Marathi Cinema News https://ift.tt/3r1UyOf
