मुंबई- बॉलिवूड अभिनेत्री प्रियांका चोप्राचं अनफिनिश्ड हे पुस्तक काही दिवसांपूर्वीच प्रकाशित झालं. तेव्हापासून या पुस्तकामुळे सोशल मीडियावर खूप चर्चेत आहे. या पुस्तकात प्रियांकानं तिच्या खासगी आयुष्यासोबत बॉलिवूड करिअरमधील अनेक खुलासे केले आहेत. आता याच प्रियांकाची मॅनेजर अंजुलाची सुद्धा भर पडली आहे. प्रियांकाच्या करिअरबद्दल बोलताना अंजुलानं सुद्धा काही चकित करणारे खुलासे केले आहेत. बॉलिवूडमध्ये भलेही प्रियांकानं खूप नाव कमावलं असलं तरीही हॉलिवूडमध्ये तिची एंट्री ने करून दिली होती. अंजुलामुळेच प्रियांकाला हॉलिवूडमध्ये मोठमोठे प्रोजक्ट मिळायला सुरुवात झाली. जेव्हा अंजुला प्रियांकाच्या हॉलिवूड एंट्रीची तयारी करत होती तेव्हा तिला बऱ्याच बॉलिवूड सेलिब्रेटींनी प्रियांका बद्दल नकारात्मक प्रतिक्रिया दिल्या होत्या असं नुकत्याच दिलेल्या एका मुलाखतीत अंजुलानं सांगितलं. अंजुला म्हणाली, 'जेव्हा मी प्रियांकाला पहिल्यांदा साइन केलं होतं. तेव्हा तिच्याबद्दल भारतातून सकारात्मक प्रतिक्रिया म्हणाव्या तशा मिळाल्या नव्हत्या. मी जेव्हा न्यूयॉर्कमध्ये मनिष गोयलच्या पार्टीसाठी गेले होते. तेव्हा अनेक बॉलिवूड सेलिब्रेटींना भेटले होते. त्यातील बहुतांश सेलिब्रेटींना प्रियांकाबद्दल नकारात्मक बोलताना मी ऐकलं होतं. प्रियांकावर मी माझा वेळ वाया घालवत आहे. ती हॉलिवूडमध्ये काम करू शकणार नाही असं सर्वांचं म्हणणं होतं.' अंजुला पुढे म्हणाली, 'मला हे सर्व ऐकल्यावर खूप त्रास झाला होता. प्रियांकावर मला विश्वास होता पण लोकांचं असं बोलणं ऐकून मी द्विधावस्थेत होते. मी खरंच माझा वेळ वाया घालवत आहे का असा विचारही मनात येऊन गेला. पण त्याचवेळी मला प्रियांकामध्ये बॉलिवूड ते हॉलिवूड असा यशस्वी प्रवास करण्याची क्षमता आणि जिद्द सुद्धा दिसत होती.' अर्थात पुढे प्रियांकानं अंजुलाचा विश्वास सार्थ ठरवला आणि आज ती एक ग्लोबल स्टार म्हणून ओळखली जात आहे.
from Marathi Bollywood News, Marathi Cinema News https://ift.tt/3ujpLPh
