मुंबई- देशातील करोनाची स्थिती वाईट आहे. दिवसेंदिवस रुग्णसंख्या झपाट्याने वाढत आहे. रुग्णांसाठी बेड आणि ऑक्सिजनचा तुटवडा भासू लागला आहे. महाराष्ट्रात १५ दिवसांचा लॉकडाउन लावण्यात आलेला आहे. सरकार नागरिकांना सतर्क राहण्याचं आणि काळजी घेण्याचं आवाहन करत आहे. परंतु, काही नागरिक मात्र या सगळ्याकडे मुळीच गांभीर्याने पाहत नाहीत. अजूनही काही लोक आपल्याला रस्त्यावर मास्क न लावता फिरताना दिसतात. अशा नागरिकांसाठी मराठमोळा अभिनेता याने खास पोस्ट करत मास्क लावण्याचं महत्व समजावून सांगितलं आहे. 'देवमाणूस' या मालिकेतून प्रेक्षकांच्या घराघरात पोहोचलेला अभिनेता किरण गायकवाड सोशल मीडियावरही सक्रिय असतो. नुकताच त्याने त्याच्या इन्स्टाग्राम अकाउंटवर एक फोटो पोस्ट केला आहे. त्यात त्याने मास्क लावला नाही तर काय होउ शकतं हे व्यवस्थित समजावून सांगितलं आहे. त्याने या पोस्टमध्ये सहा फोटो एकत्र केले आहेत. पहिल्या फोटोत किरणने मास्क व्यवस्थित लावला आहे तर दुसऱ्या फोटोत तो नाकाच्या खाली आला आहे. तिसऱ्या फोटोत मास्क तोंडाच्याही खाली आहे तर चौथ्या फोटोत मास्क हनुवटीला लावला आहे. पाचव्या फोटोत मास्क पूर्णपणे काढून टाकलाय आणि शेवटच्या फोटोत त्याने स्वतःचा मृत असल्याचा फोटो टाकला आहे. या फोटोमधून किरणने खूप महत्वाचा मेसेज दिला आहे. जर आपण मास्क व्यवस्थित लावला नाही तर आपला मृत्यू व्हायला जास्त वेळ लागणार नाही. या पोस्टमधून किरणने प्रेक्षकांना मास्कचं महत्व पटवून देण्याचा प्रयत्न केला आहे. सोबतच त्याने कॅप्शन देत लिहिलं, 'ज्याला समजलं त्याला उमगलं'. अनेकांनी किरणच्या या पोस्टवर प्रतिक्रिया दिल्या आहेत. एकाने लिहिलं, 'डॉक्टर आम्हाला कळालं तुम्हाला काय म्हणायचं आहे.' तर काही चाहत्यांनी तुम्ही मृत झाल्याचा फोटो काढून टाका असं म्हटलंय. सरकारचं नाही निदान आपल्या लाडक्या कलाकाराने सांगितलेलं तरी प्रेक्षक ऐकतील अशी किरणने आशा व्यक्त केली आहे.
from Marathi Bollywood News, Marathi Cinema News https://ift.tt/3tUg4X0
