मुंबई: बॉलिवूडमध्ये आपल्या बिनधास्त स्वभावासाठी ओळखली जाणारी अभिनेत्री पुन्हा एकदा चर्चेत आली आहे. पूजा नेहमीच राजकीय आणि सामाजिक मुद्द्यांवर आपलं मत मांडताना दिसते. आताही पूजाचं असंच एक ट्वीट चर्चेत आलं आहे. ज्यात तिनं देशातील करोनाची सद्य स्थिती आणि सरकारचं राजकारण या दोन्ही मुद्द्यांवर आपलं मत मांडलं आहे. देशात करोना रुग्णांची संख्या दिवसेंदिवस वाढत आहे आणि अशात हॉस्पिटल्समध्ये बेड आणि ऑक्सिजनच्या कमतरतेमुळे अनेकांना प्राण गमवावे लागत आहेत. ज्यामुळे राज्य आणि केंद्र सरकारच्या यंत्रणेवर प्रश्न उपस्थित केले जात आहेत. पूजा भट्टनं नुकत्याच केलेल्या आपल्या ट्वीटमध्ये केंद्र सरकारच्या यंत्रणेवर प्रश्न उपस्थित केले आहेत. तिनं लिहिलं, 'कोणाला करोनाशी लढत असलेल्या या लोकांसाठी वाईट वाटत आहे का? कारण मला नक्कीच वाटत आहे. ज्या प्रत्येक मृत्यूबद्दल मी ऐकतेय त्या त्या वेळी मला धक्का बसत आहे. ही यंत्रणा पूर्णपणे हारलेली आहे.' एकीकडे पूजानं सरकारच्या यंत्रणेवर प्रश्न उपस्थित केले आहेत तर दुसरीकडे अनेक कलाकारांनी या मुद्द्यावर आपलं मत बिनधास्तपणे मांडत सरकारवर टीका केली आहे. पूजानं आपल्या या ट्वीटमध्ये पुढे लिहिलं, 'पॉलिटिकल क्लासचे हात रक्ताने रंगले आहेत. कारण त्यांनी याची पूर्वतयारीच केली नाही. त्यांनी नेहमीच सर्व काही ठीक आहे असा चुकीचा संदेश लोकांना दिला. त्यांनी आम्हाला सर्वांना आमच्या जबाबदारीवर सोडून दिलेलं आहे.' दरम्यान देशात करोना व्हायरसच्या दुसऱ्या लाटेनं लोकांना अक्षरशः झोडपून काढलं आहे. करोना बाधितांच्या मृत्यूचं प्रमाणं वाढत आहे. तसेच रुग्णसंख्येतही सातत्यानं वाढ होताना दिसत आहे. सामान्य जनतेसहीत मनोरंजन क्षेत्रालाही याचा जोरदार फटका बसला आहे. अनेक कलाकारांना करोनाची लागण झाली आहे आणि राज्यातील सर्व प्रकारच्या शूटिंगवर बंदी घालण्यात आली आहे.
from Marathi Bollywood News, Marathi Cinema News https://ift.tt/3sK2Avs
