० तुम्ही मनोरंजनसृष्टीतील स्थित्यंतर पाहिली, आता ओटीटी (ओव्हर द टॉप) माध्यमाच्या दिशेनं सुरु असलेल्या प्रवासाबद्दल काय वाटतं?- ओटीटीनिमित्त मनोरंजनसृष्टीचा रंजक प्रवास सुरू झाला आहे. हे माध्यम पुढची किमान २० वर्षं गाजवणार. त्यानंतर याच्यापेक्षा चांगलं काही आलं तरच बदल होईल. आता प्रेक्षकांना ओटीटीची इतकी सवय झालीय की, त्यांना सिनेमागृहाकडे वळवण्यासाठी कठोर मेहनत घ्यावी लागणार आहे. या एका कारणामुळे ओटीटी अधिक प्रचलित होण्याची शक्यता वाढली आहे. ० ओटीटीवर येताना श्रियाकडून टिप्स घेतल्या का?- श्रियाचं काम बघून खूप काही शिकायला मिळतं. या नव्या माध्यमावरील सादरीकरणाची भाषा खूप वेगळी आहे. ती खूप कमी कलाकारांना उमगली आहे. त्यापैकी श्रिया एक आहे. त्या सगळ्यांकडून खूप काही शिकतोय. तसंच तुम्हाला मार्गदर्शन करणारा दिग्दर्शक मिळणं ही या माध्यमासाठी महत्त्वाची गोष्ट आहे. ० अनेक कलाकार छोट्या पडद्याकडे वळले, तुम्हाला विचारणा झाली का?- हो, मला करोनाच्या आधीपासून अनेक प्रोजेक्टसाठी विचारणा झाली. छोट्या पडद्यावर एखादं पात्र साकारताना महिन्यातले २५ ते २८ दिवस द्यावे लागतात. शिवाय, एकदा मालिकेत गुंतल्यावर दुसरं काही करता येत नाही. तसंच तोच-तोचपणा असतो, ते मला पटत नाही. तेच एका चित्रपटासाठी ३५-४० दिवस काम केलं की, दुसरं काही तरी करण्यासाठी वेळ मिळतो. मी चित्रपटांमध्ये अधिक रमतो. ० करोनाकाळात मनोरंजनसृष्टीचं मोठं नुकसान झालं, ते भरुन काढण्यासाठी काय करायला हवं असं तुम्हाला वाटतं?- एकमेकांची मदत करू शकतो. पण त्यालासुद्धा काही मर्यादा आहेत. एक गोष्ट जाणीवपूर्वक करू शकतो, ते म्हणजे बचत करणं. याच्याशिवाय दुसरा पर्याय नाही. माणसाने गरज आहे तेवढाच खर्च करावा. ० येत्या काळात दिग्दर्शकाच्या भूमिकेत दिसणार का?- हो, २०० टक्के प्रयत्न सुरू आहेत. ओटीटीवर दिग्दर्शन करायचंय, तेसुद्धा एखाद्या मराठी विषयासाठी! वेगळ्या धाटणीचा विषय आणेन. म्हणजे क्राइम थ्रिलर चालतोय म्हणून ते घेऊन येणार नाही. माझं काहीतरी वेगळं आणेन. प्रेक्षकांना नेहमीपेक्षा वेगळं काहीतरी बघायला मिळेल हे नक्की! प्रत्येकाचा यूएसपी असतो, त्यावर काम करतोय. हिंदीसाठी लिखाण सुरू आहे. छोट्या पडद्यावर काहीतरी आणण्याचा मानस आहे. ० ट्रोलिंग कसं हाताळता?- हसून दुर्लक्ष करतो. ट्रोलिंग करण्यात एवढा वेळ घालवतात त्यांची कीव येते. त्या वेळेत क्रिएटीव्ह काम केलं तर त्यांचं आयुष्य कुठच्या कुठे पोहोचेल. स्वत:चं महत्त्व वाढवण्यासाठी एखाद्या महत्त्वाच्या व्यक्तीला ट्रोल करणं हे हास्यास्पद आहे. आता तर रोस्टिंग हा प्रकारदेखील सुरू झाला आहे. अतिशय वाईट प्रकार आहे. हे सगळं गांभीर्यानं घेऊन उपयोगाचं नाही. ० तुम्ही करोनाकाळात फिट राहण्यासाठी काय केलं?- दररोज न चुकता व्यायाम करतो. आठवड्यातला एक दिवस कीक बाक्सिंगचं प्रशिक्षण घेतो.
from Marathi Bollywood News, Marathi Cinema News https://ift.tt/3BwxPie
