आवडत्या गाडीची खरेदीपरळसारख्या मराठमोळ्या भागात माझं बालपण गेलं. शाळेत असताना दसऱ्याच्या दिवशी पाटीवर सरस्वतीचं चित्र काढून पूजन केलं जायचं. लहानपणी चाळीत राहताना मोठ्यांचे शुभाशीर्वाद घ्यायचो, मिठाई मिळायची आणि थोडेफार पैसे मिळून पॉकेटमनीही जमा व्हायचा. घरोघरी जाऊन अनेकांना आपट्याची पानं सोनं म्हणून द्यायचो. त्यावेळी जास्तीत जास्त आपट्याची पानं गोळा करायचो. काही वर्षांपूर्वी 'तारक मेहता का उल्टा चश्मा' मालिकेच्या सेटवर आम्ही रावण दहनाचा भाग शूट केला होता. विशेष म्हणजे माझी आवडती गाडी मी दसऱ्याच्या दिवशीच घेतली आहे. या सर्व दसऱ्याच्या अविस्मरणीय आठवणी आजही माझ्याबरोबर आहेत. - , अभिनेता चांगल्या कामाची सुरुवातवरळीच्या बीडीडी चाळीत मी लहानाची मोठी झाले. दसऱ्याच्या दिवशी घरी पारंपरिक पद्धतीनं संगीतमय पूजा होत आली आहे. गोड जेवणाचा बेत असतो आणि संध्याकाळी घरोघरी आपट्याची पानं देऊन सोनं लुटलं जातं. मोठ्यांचे शुभाशीर्वाद घेते. नवीन आलेल्या पिकाचं तोरण तयार करून आई आवर्जून ते दरवाज्याला बांधते. साडेतीन मुहूर्तांपैकी एक शुभमुहूर्त असल्यामुळे पूर्वीपासून आजही मी दसऱ्याला काहीतरी छोटी-मोठी सोन्याची गोष्ट खरेदी करत आली आहे. कोणत्याही चांगल्या कामाची सुरुवात मी याच दिवसापासून करते. - रुपाली भोसले, अभिनेत्री पारंपरिक पद्धत महत्त्वाचीआजही माझ्या घरात पाटी-वहीवर सरस्वतीचं चित्र काढून तिचं पूजन केलं जातं. आमच्या दादरच्या राजा शिवाजी विद्यालयात दसऱ्याच्या दुसऱ्या दिवशी वहीच्या कोणत्या पानावर सरस्वती काढली आहे हे पाहून कसा साजरा केला हे विचारलं जायचं. त्याचसोबत फळ्यावर सरस्वती काढली जायची आणि ती कशी काढतात हे शिकवलं जायचं. सध्याच्या सगळ्यांच्या व्यग्र वेळापत्रकामुळे पूर्वीचा पारंपरिक पद्धतीनं सण साजरा करण्याचा उत्साह कमी झालाय. पण आताच्या पिढीनं पारंपारिक पद्धतीनं दसरा साजरा करायला हवा. तरच येणाऱ्या पिढीला त्याचं महत्त्व कळेल आणि संस्कृती जोपासली जाईल. - हार्दिक जोशी, अभिनेता सकारात्मक राहणं हा संकल्पबालपणी आम्ही दसऱ्याच्या दिवशी नवीन कपडे घालून पाटीचं, शस्त्रांचं आणि वाहनाचं पूजन करायचो. झेंडूच्या फुलांपासून हार आणि तोरणसुद्धा बनवलं जायचं. शाळेला सुट्टी असली तरी दसऱ्याच्या दिवशी तासभर शाळेत जाऊन पाटीपूजन करायची एक वेगळीच मजा असायची. मी कामात कितीही व्यग्र असले तरी दसऱ्याच्या दिवशी मात्र पुण्यात येऊन कुटुंबाबरोबर वेळ घालवते, गोड पदार्थांच्या जेवणाचा आस्वाद घेते. माझ्यासाठी सकारात्मक राहणं हा संकल्प तर मर्यादित न राहता स्वतःच्या सीमा रुंदावणे आणि नवनवीन शिखरापर्यंत पोहोचण्याचा प्रयत्न करणे हे सीमोल्लंघन आहे. - अनुजा साठे, अभिनेत्री घरच्या श्रीखंडाची मेजवानीयेणाऱ्या नवीन वर्षात नेमकं काय नवं शिकता येईल आणि कोणत्या गोष्टींचं सीमोल्लंघन करता येईल, हे मी पाहतो. करोनानंतर सारं जग सीमोल्लंघन करू पाहणार आहे, तर ते यशस्वी व्हावं असं वाटतं. पुण्यात माझं बालपण गेलं. दसऱ्याच्या निमित्तानं घरी चक्का आणून श्रीखंड बनविण्याचा एक कौटुंबिक उपक्रमच असायचा. त्यानंतर चार-पाच तासांची झोप ठरलेली असायची. झेंडूच्या फुलांपासून तोरणं बनवणे, आपट्याची पानं देऊन सोनं लुटणे, पाटीवर सरस्वती काढून तिचं पूजन, शस्त्रपूजन, पुस्तक-वही यांचं पूजन करत आलोय. आता त्याची जागा लॅपटॉपनं घेतली असली तरी भावना मात्र तीच आहे. - क्षितिज पटवर्धन, लेखक • संकलन : अभिषेक तेली, मुंबई विद्यापीठ
from Marathi Bollywood News, Marathi Cinema News https://ift.tt/3DMZYD5
