मिनी चित्रपटगृह असावंएसटी ही ग्रामीण भागातला फार महत्त्वाचा घटक आहे. तालुका स्तरावरील मुबलक जागेत असलेल्या एसटी डेपो जवळ मिनिप्लेक्स उभं करायचं. गावाहून तालुक्याला जायला एक आणि नंतर यायला एकच एसटी असते. त्यामुळे कामानिमित्त गेलेल्या माणसाचं काम लवकर झालं, तर तो बस येईपर्यंत स्टँडवरच बसलेला असतो. त्यामुळे तिथे मिनिप्लेक्स असावं असा विचार होता. प्रवाशांना परवडू शकेल इतका त्याचा दर ठेवायचा. यातून एसटीसाठी महसूलदेखील मिळू शकतो. लहानपणी लालपरीनं बीड ते पुणे असा प्रवास अनेक वर्षं केला आहे. बसमध्ये बसायचं, रस प्यायचा, लिमलेटच्या गोळ्या खायच्या अशा अनेक आठवणी आहेत. - आत्मियतेचा प्रश्नकर्मचाऱ्यांच्या मागण्या अवास्तव नाहीत. त्यावर सरकारला तोडगा काढावा लागेल. लालपरीचे चालक जबाबदारीनं, काळजीनं प्रवाशांची ने-आण करतात. अनेक वर्षं मी एसटीनं देवरुखपर्यंतचा प्रवास केला आहे. आपल्याला ही आपुलकी खासगीकरणामध्ये पाहायला मिळणार नाही. आजही दुर्गम भागांमध्ये लालपरी वस्तीसाठी जाते. खासगी गाडीतून जायचं झालं तर ते गाडी भरल्याशिवाय सोडत नाहीत. पण लालपरी बाबतीत तसं नाही आहे, अगदी दोन-चार प्रवासी असतील तरी ती नेते. एसटी आपल्या आत्मियतेचा प्रश्न असेल तर ती जिवंत राहाणं भाग आहे. - वैभव मांगले जोडणारा दुवालालपरीनं प्रवास करणाऱ्यांची संख्या हजारोंच्या घरात आहे. राज्याच्या कानाकोपऱ्यात खेड्या-पाड्यांना जोडणारं कुठलं साधन असेल तर ते म्हणजे एसटी. आज आपण जे बघतोय त्यात एसटी कर्मचाऱ्यांचा विचार होणं गरजेचं आहे. यातून काहीतरी समाधानकारक सुवर्णमध्य निघायला हवा, असं मला वाटतं. यावर्षी ऑगस्टमध्ये माझ्या करिअरला २१ वर्षं पूर्ण झाली. त्यानिमित्त एसटी स्टँडवर जाऊन जी सुटकेस मी घेऊन आलो होतो त्या बॅगेसह लालपरीसह फोटो काढला होता. या क्षेत्रात आल्यानंतरही जवळपास दहा वर्षं मी माजलगाव-मुंबई असा एसटीनं प्रवास केला आहे. - संदीप पाठक लहानाचं मोठं केलंकर्मचाऱ्यांच्या मागण्या आणि सरकारची बाजू यातून सुवर्णमध्य काढणं गरजेचं आहे. याची झळ सर्वसामान्य माणसांना लागतेय. कोकणाविषयी सांगायचं झालं तर तिकडे ठरावीक गावापर्यंत रेल्वे जाते, पुढे लालपरी हाच पर्याय आहे. आज सर्वसामान्य लोकांकडे हवा तेवढा पैसा, उमेद नाही. रेल्वे, खासगी बस अलीकडे आल्या आहेत; पण लहानपणी कोकणात जाताना एसटीनंच गेलो आहे. माझ्या पहिल्या मालिकेचं शूटिंग कोकणात दाभोळच्या पुढे झालं होतं. त्यावेळी आम्ही सगळे बसनं गेलो होतो. ज्या साधनांसह आपण लहानाचे मोठे झालो त्या लालपरीचा मान राखायला हवा. - कोणीतरी नमतं घ्यावंएसटी कर्मचाऱ्यांच्या मागण्या मान्य कराव्यात. सध्याच्या परिस्थितीत थोडं यांनी मागे यावं, दोन पावलं त्यांनी पुढे येऊन यातून काहीतरी तोडगा काढणं महत्त्वाचं आहे. 'नवरा माझा नवसाचा' चित्रपटाच्या वेळी सचिन पिळगांवकर मला बॉम्बे मध्यवर्तीच्या एसटी महामंडळाच्या ऑफिसमध्ये घेऊन गेले होते. त्यांनी जनरल मॅनेजरशी ओळख करून दिली आणि त्यांच्याकडून मला एसटी शिकवण्याची परवानगी घेतली. एका चालकानं मला एसटी चालवायला शिकवली आणि त्यानंतर मी चित्रपटात एसटी चालवली. - सुनील तावडे तो विश्वास महत्त्वाचाएसटी कर्मचाऱ्यांच्या मागण्या मान्य करायला काहीच हरकत नाही. तसंच एसटीनंही बदलत्या काळानुसार प्रवाशांच्या बदलणाऱ्या संकल्पना लक्षात घेऊन बदल केला तर त्याचा फायदा नक्कीच होईल. १९९८-९९ साली पुण्यात नाटकाचा प्रयोग करून घरी जाताना स्वारगेटला आलो, एसटीत चढलो तर माझं पाकीट कोणीतरी मारलं होतं. मी एसटी वाहकाला माझ्याकडे पैसे नसल्याचं मी सांगितलं. कोल्हापूरला उतरल्यावर पैसे दे असं म्हणत त्यांनी मला तिकीट दिलं. कोल्हापूरला उतरल्यावर मी पैसे दिले. ही आपुलकी, विश्वास ठेवणं बाकी कुठे सापडणं कठीण आहे. - प्रियदर्शन जाधव संकलन : वेदांगी काण्णव, मुंबई विद्यापीठ
from Marathi Bollywood News, Marathi Cinema News https://ift.tt/3xjDuY9
